Here folweth the Prologe of the Maunciples Tale.
Wite ye nat wher ther stant a litel toun
Which that y-cleped is Bob-up-and-doun,
Under the Blee, in Caunterbury weye?
Ther gan our hoste for to Iape and pleye,
And seyde, ‘sirs, what! Dun is in the myre!
Is ther no man, for preyere ne for hyre,
That wol awake our felawe heer bihinde?
A theef mighte him ful lightly robbe and binde.
See how he nappeth! see, for cokkes bones,
As he wol falle from his hors at ones.
Is that a cook of Londoun, with meschaunce?
Do him come forth, he knoweth his penaunce,
For he shal telle a tale, by my fey!
Al-though it be nat worth a botel hey.
Awake, thou cook,’ quod he, ‘god yeve thee sorwe,
What eyleth thee to slepe by the morwe?
Hastow had fleen al night, or artow dronke,
Or hastow with som quene al night y-swonke,
So that thou mayst nat holden up thyn heed?’
Heading: from E. Cp.; Cm. has — Heryth the merye wordys of the Host to the cok of Lundene. 1. E. Hn. Woot; Cp. Hl. Wot; Cm. Wote; Pt. Ln. Wete; Wite is better, as in l. 82. 7. Cm. here; E. Hn. Hl. al; rest omit. 9. So Cp. Hl.; E. see how for; Hn. se how for; Cm. so how for.
This cook, that was ful pale and no-thing reed,
Seyde to our host, ‘so god my soule blesse,
As ther is falle on me swich hevinesse,
Noot I nat why, that me were lever slepe
Than the beste galoun wyn in Chepe.’
‘Wel,’ quod the maunciple, ‘if it may doon ese
To thee, sir cook, and to no wight displese
Which that heer rydeth in this companye,
And that our host wol, of his curteisye,
I wol as now excuse thee of thy tale;
For, in good feith, thy visage is ful pale,
Thyn yën daswen eek, as that me thinketh,
And wel I woot, thy breeth ful soure stinketh,
That sheweth wel thou art not wel disposed;
Of me, certein, thou shalt nat been y-glosed.
Se how he ganeth, lo, this dronken wight,
As though he wolde us swolwe anon-right.
Hold cloos thy mouth, man, by thy fader kin!
The devel of helle sette his foot ther-in!
Thy cursed breeth infecte wol us alle;
Fy, stinking swyn, fy! foule moot thee falle!
A! taketh heed, sirs, of this lusty man.
Now, swete sir, wol ye Iusten atte fan?
Ther-to me thinketh ye been wel y-shape!
I trowe that ye dronken han wyn ape,
And that is whan men pleyen with a straw.’
And with this speche the cook wex wrooth and wraw,
And on the maunciple he gan nodde faste
For lakke of speche, and doun the hors him caste,
Wher as he lay, til that men up him took;
This was a fayr chivachee of a cook!
Allas! he nadde holde him by his ladel!
And, er that he agayn were in his sadel,
Ther was greet showving bothe to and fro,
To lifte him up, and muchel care and wo,
So unweldy was this sory palled gost.
And to the maunciple thanne spak our host,
‘By-cause drink hath dominacioun
Upon this man, by my savacioun
I trowe he lewedly wolde telle his tale.
For, were it wyn, or old or moysty ale,
That he hath dronke, he speketh in his nose,
And fneseth faste, and eek he hath the pose.
He hath also to do more than y-nough
To kepe him and his capel out of slough;
And, if he falle from his capel eft-sone,
Than shul we alle have y-nough to done,
In lifting up his hevy dronken cors.
Telle on thy tale, of him make I no fors.
29. E. omits as. 31. E. Hn. Hl. daswen; Cm. daswe; Cp. dasewen; Pt. dasen; Ln. dasoweþe. 36. Cp. Ln. vs swolwe; rest swolwe vs. 40. E. thou; rest thee or the. 46. Cm. Pt, Ln. wex; rest wax. 49. E. Hn. vp hym; rest him vp. 55. E. vnweeldy. 59. E. Cm. Ln. put lewedly before he. 62. So E. Hn. Cp. Ln. Hl.; Cm. sneseth; Pt. galpeth. 64. E. of; rest of the.
But yet, maunciple, in feith thou art to nyce,
Thus openly repreve him of his vyce.
Another day he wol, peraventure,
Reclayme thee, and bringe thee to lure;
I mene, he speke wol of smale thinges,
As for to pinchen at thy rekeninges,
That wer not honeste, if it cam to preef.’
‘No,’ quod the maunciple, ‘that were a greet mescheef!
So mighte he lightly bringe me in the snare.
Yet hadde I lever payen for the mare
Which he rit on, than he sholde with me stryve;
I wol nat wratthe him, al-so mote I thryve!
That that I spak, I seyde it in my bourde;
And wite ye what? I have heer, in a gourde,
A draught of wyn, ye, of a rype grape,
And right anon ye shul seen a good Iape.
This cook shal drinke ther-of, if I may;
Up peyne of deeth, he wol nat seye me nay!’
76. All the 7 Mss. retain a: Hl. omits No. 79. E. Which that; rest omit that. 81. E. speke; rest spak. 85. E. Pt. if that; rest omit that.
And certeinly, to tellen as it was,
Of this vessel the cook drank faste, allas!
What neded him? he drank y-nough biforn.
And whan he hadde pouped in this horn,
To the maunciple he took the gourde agayn;
And of that drinke the cook was wonder fayn,
And thanked him in swich wyse as he coude.
89. So E.; Cm. nedith hym; Hn. Hl. neded it; rest needeth it. 90. E. Hn. Cm. this; rest his.
Than gan our host to laughen wonder loude,
And seyde, ‘I see wel, it is necessarie,
Wher that we goon, good drink we with us carie;
For that wol turne rancour and disese
Tacord and love, and many a wrong apese.
96. E. that; rest good. 98. So E. Hn.; Cm. Cp. Ln. Hl. To acord; Pt. To pees.
O thou Bachus, y-blessed be thy name,
That so canst turnen ernest in-to game!
Worship and thank be to thy deitee!
Of that matere ye gete na-more of me.
Tel on thy tale, maunciple, I thee preye.’
99. Hl. thou; rest omit. Cp. Pt. Ln. Bachus; rest Bacus.
‘Wel, sir,’ quod he, ‘now herkneth what I seye.’
Thus endeth the Prologe of the Manciple.
Colophon. From Pt.
Last updated Sunday, March 27, 2016 at 11:52