Here biginneth the Persones Tale.
Ier. 6º. State super vias et videte et interrogate de viis antiquis, que sit via bona; et ambulate in ea, et inuenietis refrigerium animabus vestris, &c.
§ 1. Our swete lord god of hevene, that no man wole perisse, but wole that we comen alle to the knoweleche of him, and to the blisful lyf that is perdurable, /75 amonesteth us by the prophete Ieremie, that seith in this wyse: / ‘stondeth upon the weyes, and seeth and axeth of olde pathes (that is to seyn, of olde sentences) which is the goode wey; / and walketh in that wey, and ye shul finde refresshinge for your soules,’ &c. / Manye been the weyes espirituels that leden folk to oure Lord Iesu Crist, and to the regne of glorie. / Of whiche weyes, ther is a ful noble wey and a ful covenable, which may nat faile to man ne to womman, that thurgh sinne hath misgoon fro the righte wey of Ierusalem celestial; /80 and this wey is cleped Penitence, of which man sholde gladly herknen and enquere with al his herte; / to witen what is Penitence, and whennes it is cleped Penitence, and in how manye maneres been the accions or werkinges of Penitence, / and how manye spyces ther been of Penitence, and whiche thinges apertenen and bihoven to Penitence, and whiche thinges destourben Penitence. /
Heading. From E. (E. Heere; Persouns). 75. E. om. 2nd to. 76. E. and seith; rest that seith. 78. E. Hn. Ln. shal; Pt. shul. 79. Pt. espiritual; Ln. spirituele. 80. E. om. 2nd ful. E. to no man; rest om. no. 82. Ln. penance (for 2nd and 3rd Penitence). 83. E. speces; Hl. spieces; rest spices.
§ 2. Seint Ambrose seith, that ‘Penitence is the pleyninge of man for the gilt that he hath doon, and na-more to do any thing for which him oghte to pleyne.’ / And som doctour seith: ‘Penitence is the waymentinge of man, that sorweth for his sinne 571and pyneth him-self for he hath misdoon.' /85 Penitence, with certeyne circumstances, is verray repentance of a man that halt him-self in sorwe and other peyne for hise giltes. / And for he shal be verray penitent, he shal first biwailen the sinnes that he hath doon, and stidefastly purposen in his herte to have shrift of mouthe, and to doon satisfaccioun, / and never to doon thing for which him oghte more to biwayle or to compleyne, and to continue in goode werkes: or elles his repentance may nat availle. / For as seith seint Isidre: ‘he is a Iaper and a gabber, and no verray repentant, that eftsoone dooth thing, for which him oghte repente.’ / Wepinge, and nat for to stinte to doon sinne, may nat avaylle. /90 But nathelees, men shal hope that every tyme that man falleth, be it never so ofte, that he may arise thurgh Penitence, if he have grace: but certeinly it is greet doute. / For as seith Seint Gregorie: ‘unnethe aryseth he out of sinne, that is charged with the charge of yvel usage.’ / And therfore repentant folk, that stinte for to sinne, and forlete sinne er that sinne forlete hem, holy chirche holdeth hem siker of hir savacioun. / And he that sinneth, and verraily repenteth him in his laste ende, holy chirche yet hopeth his savacioun, by the grete mercy of oure lord Iesu Crist, for his repentaunce; but tak the siker wey. /
84. E. om. the before gilt. 85. Ln. Hl. peyneth. 86. Hl. holt. 88. E. om. to bef. biwayle and continue. 90. Hl. doon; E. om.; rest do. 94. Hl. Ln. ende; E. Hn. Pt. om. E. taak (glossed tene); siker (glossed certum). Cm. sikerer. After wey, Cm. adds —& the more certeyn.
§ 3. And now, sith I have declared yow what thing is Penitence, now shul ye understonde that ther been three accions of Penitence. /95 The firste accion of Penitence is, that a man be baptized after that he hath sinned. / Seint Augustin seith: ‘but he be penitent for his olde sinful lyf, he may nat biginne the newe clene lif.’ / For certes, if he be baptized withouten penitence of his olde gilt, he receiveth the mark of baptisme, but nat the grace ne the remission of his sinnes, til he have repentance verray. / Another defaute is this, that men doon deedly sinne after that they han received baptisme. / The thridde defaute is, that men fallen in venial sinnes after hir baptisme, fro day to day. /100 Ther-of seith Seint Augustin, that 'penitence of goode and humble folk is the penitence of every day.’ /
96. All but E. om. accion of Penitence. 97. Hl. but if. 98-100. E. Hn. baptesme. 100. Hl. in-to venial synne.
§ 4. The spyces of Penitence been three. That oon of hem is solempne, another is commune, and the thridde is privee. / Thilke penance that is solempne, is in two maneres; as to be put out of holy chirche in lente, for slaughtre of children, and swich maner thing. / Another is, whan a man hath sinned openly, of which sinne the fame is openly spoken in the contree; and thanne holy chirche by Iugement destreineth him for to do open penaunce. / Commune penaunce is that preestes enioinen men comunly in certeyn caas; as for to goon, peraventure, naked in pilgrimages, or bare-foot. /105 Privee penaunce is thilke that men doon alday for privee sinnes, of whiche we shryve us prively and receyve privee penaunce. /
102. E. Hn. speces (glossed species); rest spices. 103. E. Hn. As to; rest as is to. 104. E. Another thyng is; rest om. thyng. Hl. streyneth. 105. E. Cm. om. comunly. 106. E. they shryue hem.
§ 5. Now shaltow understande what is bihovely and necessarie to verray parfit Penitence. And this stant on three thinges; / Contricioun of herte, Confessioun of Mouth, and Satisfaccioun. / For which seith Seint Iohn Crisostom: ‘Penitence destreyneth a man to accepte benignely every peyne that him is enioyned, with contricion of herte, and shrift of mouth, with satisfaccion; and in werkinge of alle maner humilitee.’ / And this is fruitful Penitence agayn three thinges in whiche we wratthe oure lord Iesu Crist: /110 this is to seyn, by delyt in thinkinge, by recchelesnesse in spekinge, and by wikked sinful werkinge. / And agayns thise wikkede giltes is Penitence, that may be lykned un-to a tree. /
107. E. is bihouely; Cm. is behofly; rest bihoueth (behoueth). Hl. stondith. 109. Hl. humblete. 112. Hl. these thre wickid.
§ 6. The rote of this tree is Contricion, that hydeth him in the herte of him that is verray repentant, right as the rote of a tree hydeth him in the erthe. / Of the rote of Contricion springeth a stalke, that bereth braunches and leves of Confession, and fruit of Satisfaccion. / For which Crist seith in his gospel: ‘dooth digne fruit of Penitence’; for by this fruit may men knowe this tree, and nat by the rote that is hid in the herte of man, ne by the braunches ne by the leves of Confession. /115 And therefore oure Lord Iesu Crist seith thus: 'by the fruit of hem ye shul knowen hem.’ / Of this rote eek springeth a seed of grace, the which seed is moder of sikernesse, and this seed is egre and hoot. / The grace of this seed springeth of god, thurgh remembrance of the day of dome and on the peynes of helle. / Of this matere seith Salomon, that ‘in the drede of god man forleteth his sinne.’ / The hete of this seed is the love of god, and the desiring of the Ioye perdurable. /120 This hete draweth the herte of a man to god, and dooth him haten his sinne. / For soothly, ther is no-thing that savoureth so wel to a child as the milk of his norice, ne no-thing is to him more abhominable than thilke milk whan it is medled with other mete. / Right so the sinful man that loveth his sinne, him semeth that it is to him most swete of any-thing; / but fro that tyme that he loveth sadly our lord Iesu Crist, and desireth the lif perdurable, ther nis to him no-thing more abhominable. / For soothly, the lawe of god is the love of god; for which David the prophete seith: ‘I have loved thy lawe and hated wikkednesse and hate'; he that loveth god kepeth his lawe and his word. /125 This tree saugh the prophete Daniel in spirit, up-on the avision of the king Nabugodonosor, whan he conseiled him to do penitence. / Penaunce is the tree of lyf to hem that it receiven, and he that holdeth him in verray penitence is blessed; after the sentence of Salomon. /
117. E. a grace (for of grace). 122. E. om. is to him. 125. E. loued god; rest loueth god. 126. E. om. in spirit. up-on] E. in.
§ 7. In this Penitence or Contricion man shal understonde foure thinges, that is to seyn, what is Contricion: and whiche been the causes that moeven a man to Contricion: and how he sholde be contrit: and what Contricion availleth to the soule. / Thanne is it thus: that Contricion is the verray sorwe that a man receiveth in his herte for his sinnes, with sad purpos to shryve him, and to do penaunce, and nevermore to do sinne. / And this sorwe shal been in this manere, as seith seint Bernard: 'it shal been hevy and grevous, and ful sharpe and poinant in herte.' /130 First, for man hath agilt his lord and his creatour; and more sharpe and poinant, for he hath agilt his fader celestial; / and yet more sharpe and poinant, for he hath wrathed and agilt him that boghte him; which with his precious blood hath delivered us fro the bondes of sinne, and fro the crueltee of the devel and fro the peynes of helle. /
131. Cp. agult; Hl. agiltid.
§ 8. The causes that oghte moeve a man to Contricion been six. First, a man shal remembre him of hise sinnes; / but loke 574he that thilke remembrance ne be to him no delyt by no wey, but greet shame and sorwe for his gilt. For Iob seith: ‘sinful men doon werkes worthy of Confession.’ / And therfore seith Ezechie: ‘I wol remembre me alle the yeres of my lyf, in bitternesse of myn herte.' /135 And god seith in the Apocalips: remembreth yow fro whennes that ye been falle’; for biforn that tyme that ye sinned, ye were the children of god, and limes of the regne of god; / but for your sinne ye been woxen thral and foul, and membres of the feend, hate of aungels, sclaundre of holy chirche, and fode of the false serpent; perpetuel matere of the fyr of helle. / And yet more foul and abhominable, for ye trespassen so ofte tyme, as doth the hound that retourneth to eten his spewing. / And yet be ye fouler for your longe continuing in sinne and your sinful usage, for which ye be roten in your sinne, as a beest in his dong. / Swiche manere of thoghtes maken a man to have shame of his sinne, and no delyt, as god seith by the prophete Ezechiel: /140 ‘ye shal remembre yow of youre weyes, and they shuln displese yow.’ Sothly, sinnes been the weyes that leden folk to helle. /
134. E. looke he; rest om. he. 135. Hl. Ln. Ezechiel. 137. E. perpetueel.
§ 9. The seconde cause that oghte make a man to have desdeyn of sinne is this: that, as seith seint Peter, ‘who-so that doth sinne is thral of sinne’; and sinne put a man in greet thraldom. / And therfore seith the prophete Ezechiel: ‘I wente sorweful in desdayn of my-self.’ And certes, wel oghte a man have desdayn of sinne, and withdrawe him from that thraldom and vileinye. / And lo, what seith Seneca in this matere. He seith thus: ‘though I wiste that neither god ne man ne sholde nevere knowe it, yet wolde I have desdayn for to do sinne.’ / And the same Seneca also seith: ‘I am born to gretter thinges than to be thral to my body, or than for to maken of my body a thral.' /145 Ne a fouler thral may no man ne womman maken of his body, than for to yeven his body to sinne. / Al were it the fouleste cherl, or the fouleste womman that liveth, and leest of value, yet is he thanne more foule and more in servitute. / Evere fro the hyer degree that man falleth, the more is he thral, and more to god and to the world vile and abhominable. / O gode god, wel oghte man have desdayn of sinne; sith that, thurgh sinne, ther he was free, now is he maked bonde. / And therfore seyth Seint Augustin: ‘if thou hast desdayn of thy servant, if he agilte or sinne, have thou thanne desdayn that thou thy-self sholdest do sinne.' /150 Take reward of thy value, that thou ne be to foul to thy-self. / Allas! wel oghten they thanne have desdayn to been servauntz and thralles to sinne, and sore been ashamed of hem-self, / that god of his endelees goodnesse hath set hem in heigh estaat, or yeven hem wit, strengthe of body, hele, beautee, prosperitee, / and boghte hem fro the deeth with his herte blood, that they so unkindely, agayns his gentilesse, quyten him so vileinsly, to slaughtre of hir owene soules. / O gode god, ye wommen that been of so greet beautee, remembreth yow of the proverbe of Salomon, that seith: /155 'he lykneth a fair womman, that is a fool of hir body, lyk to a ring of gold that were in the groyn of a sowe.’ / For right as a sowe wroteth in everich ordure, so wroteth she hir beautee in the stinkinge ordure of sinne. /
143. E. And certes; rest om. And. 144. E. Hn. wrongly ins, god after that. 147. All seruitute. 148. E. om. vile and. 150. Cp. Pt. Ln. Hl. Austyn. 152. Hl. men (for they). 154. Cm. vileynly. 155, 6. So Hl.; E. Hn. he seith likneth; Cp. he seith he likeneth; Cm. he seith & likkenyth; Pt. He likneth. E. soughe; rest sowe. 157. E. soughe; om. she.
§ 10. The thridde cause that oghte moeve a man to Contricion, is drede of the day of dome, and of the horrible peynes of helle. / For as seint Ierome seith: ‘at every tyme that me remembreth of the day of dome, I quake; / for whan I ete or drinke, or what-so that I do, evere semeth me that the trompe sowneth in myn ere: /160 riseth up, ye that been dede, and cometh to the Iugement.’ / O gode god, muchel oghte a man to drede swich a Iugement, ‘ther-as we shullen been alle,’ as seint Poul seith, ‘biforn the sete of oure lord Iesu Crist’; / wher-as he shal make a general congregacion, wher-as no man may been absent. / For certes, there availleth noon essoyne ne excusacion. / And nat only that oure defautes shullen be iuged, but eek that alle oure werkes shullen openly be knowe. /165 And as seith Seint Bernard: ‘ther ne shal no pledinge availle, ne no sleighte; we shullen yeven rekeninge of everich ydel word.’ / Ther shul we han a Iuge that may nat been deceived ne corrupt. And why? For, certes, alle our thoghtes been discovered as to him; ne for preyere ne for mede he shal nat been corrupt. / And therfore 576seith Salomon: ‘the wratthe of god ne wol nat spare no wight, for preyere ne for yifte’; and therfore, at the day of doom, ther nis noon hope to escape. / Wherfore, as seith Seint Anselm: ‘ful greet angwissh shul the sinful folk have at that tyme; / ther shal the sterne and wrothe Iuge sitte above, and under him the horrible put of helle open to destroyen him that moot biknowen hise sinnes, whiche sinnes openly been shewed biforn god and biforn every creature. /170 And on the left syde, mo develes than herte may bithinke, for to harie and drawe the sinful soules to the pyne of helle. / And with-inne the hertes of folk shal be the bytinge conscience, and with-oute-forth shal be the world al brenninge. / Whider shal thanne the wrecched sinful man flee to hyden him? Certes, he may nat hyden him; he moste come forth and shewen him.’ / For certes, as seith seint Ierome: ‘the erthe shal casten him out of him, and the see also; and the eyr also, that shal be ful of thonder-clappes and lightninges.’ / Now sothly, who-so wel remembreth him of thise thinges, I gesse that his sinne shal nat turne him in-to delyt, but to greet sorwe, for drede of the peyne of helle. /175 And therfore seith Iob to god: ‘suffre, lord, that I may a whyle biwaille and wepe, er I go with-oute returning to the derke lond, covered with the derknesse of deeth; / to the lond of misese and of derknesse, where-as is the shadwe of deeth; where-as ther is noon ordre or ordinance, but grisly drede that evere shal laste.’ / Lo, here may ye seen that Iob preyde respyt a whyle, to biwepe and waille his trespas; for soothly oon day of respyt is bettre than al the tresor of the world. / And for-as-muche as a man may acquiten him-self biforn god by penitence in this world, and nat by tresor, therfore sholde he preye to god to yeve him respyt a whyle, to biwepe and biwaillen his trespas. / For certes, al the sorwe that a man mighte make fro the beginning of the world, nis but a litel thing at regard of the sorwe of helle. /180 The cause why that Iob clepeth helle ‘the lond of derknesse’; / under-stondeth that he clepeth it ‘londe’ or erthe, for it is stable, and nevere shal faille; 'derk,' for he that is in helle hath defaute of light material. / For certes, 577the derke light, that shal come out of the fyr that evere shal brenne, shal turne him al to peyne that is in helle; for it sheweth him to the horrible develes that him tormenten. / ‘Covered with the derknesse of deeth’: that is to seyn, that he that is in helle shal have defaute of the sighte of god; for certes, the sighte of god is the lyf perdurable. / ‘The derknesse of deeth’ been the sinnes that the wrecched man hath doon, whiche that destourben him to see the face of god; right as doth a derk cloude bitwixe us and the sonne. /185 'Lond of misese': by-cause that ther been three maneres of defautes, agayn three thinges that folk of this world han in this present lyf, that is to seyn, honours, delyces, and richesses. / Agayns honour, have they in helle shame and confusion. / For wel ye woot that men clepen ‘honour’ the reverence that man doth to man; but in helle is noon honour ne reverence. For certes, na-more reverence shal be doon there to a king than to a knave. / For which god seith by the prophete Ieremye: ‘thilke folk that me despysen shul been in despyt.’ / ‘Honour’ is eek cleped greet lordshipe; ther shal no man serven other but of harm and torment. ‘Honour’ is eek cleped greet dignitee and heighnesse; but in helle shul they been al fortroden of develes. /190 And god seith: 'the horrible develes shulle goon and comen up-on the hevedes of the dampned folk.’ And this is for-as-muche as, the hyer that they were in this present lyf, the more shulle they been abated and defouled in helle. / Agayns the richesses of this world, shul they han misese of poverte; and this poverte shal been in foure thinges: / in defaute of tresor, of which that David seith; ‘the riche folk, that embraceden and oneden al hir herte to tresor of this world, shul slepe in the slepinge of deeth; and no-thing ne shul they finden in hir handes of al hir tresor.’ / And more-over, the miseise of helle shal been in defaute of mete and drinke. / For god seith thus by Moyses; ‘they shul been wasted with hunger, and the briddes of helle shul devouren hem with bitter deeth, and the galle of the dragon shal been hir drinke, and the venim of the dragon hir morsels.' /195 And forther-over, hir miseise shal been in defaute of clothing: for they shulle be naked in body as of clothing, save the fyr in which they brenne and othere filthes; / and naked shul they been of 578soule, of alle manere vertues, which that is the clothing of the soule. Where been thanne the gaye robes and the softe shetes and the smale shertes? / Lo, what seith god of hem by the prophete Isaye: ‘that under hem shul been strawed motthes, and hir covertures shulle been of wormes of helle.’ / And forther-over, hir miseise shal been in defaute of freendes; for he nis nat povre that hath goode freendes, but there is no freend; / for neither god ne no creature shal been freend to hem, and everich of hem shal haten other with deedly hate. /200 'The sones and the doghtren shullen rebellen agayns fader and mooder, and kinrede agayns kinrede, and chyden and despysen everich of hem other,’ bothe day and night, as god seith by the prophete Michias. / And the lovinge children, that whylom loveden so fleshly everich other, wolden everich of hem eten other if they mighte. / For how sholden they love hem togidre in the peyne of helle, whan they hated ech of hem other in the prosperitee of this lyf? / For truste wel, hir fleshly love was deedly hate; as seith the prophete David: ‘who-so that loveth wikkednesse he hateth his soule.’ / And who-so hateth his owene soule, certes, he may love noon other wight in no manere. /205 And therefore, in helle is no solas ne no frendshipe, but evere the more fleshly kinredes that been in helle, the more cursinges, the more chydinges, and the more deedly hate ther is among hem. / And forther-over, they shul have defaute of alle manere delyces; for certes, delyces been after the appetytes of the fyve wittes, as sighte, heringe, smellinge, savoringe, and touchinge. / But in helle hir sighte shal be ful of derknesse and of smoke, and therfore ful of teres; and hir heringe, ful of waymentinge and of grintinge of teeth, as seith Iesu Crist; / hir nosethirles shullen be ful of stinkinge stink. And as seith Isaye the prophete: ‘hir savoring shal be ful of bitter galle.’ / And touchinge of al hir body, y-covered with ‘fyr that nevere shal quenche, and with wormes that nevere shul dyen,’ as god seith by the mouth of Isaye. /210 And for-as-muche as they shul nat wene that they may dyen for peyne, and by hir deeth flee fro peyne, that may they understonden by the word of Iob, that seith: 'ther-as is the shadwe of deeth.’ / Certes, a shadwe hath the lyknesse of the thing of which it is shadwe, but shadwe is nat the same thing of which it is shadwe. / Right so fareth the peyne of helle; it is lyk deeth for the horrible anguissh, and why? For it peyneth hem evere, as though they sholde dye anon; but certes they shal nat dye. / For as seith Seint Gregorie: ‘to wrecche caytives shal be deeth with-oute deeth, and ende with-outen ende, and defaute with-oute failinge. / For hir deeth shal alwey liven, and hir ende shal everemo biginne, and hir defaute shal nat faille.' /215 And therfore seith Seint Iohn the Evangelist: ‘they shullen folwe deeth, and they shul nat finde him; and they shul desyren to dye, and deeth shal flee fro hem.’ / And eek Iob seith: that ‘in helle is noon ordre of rule.’ / And al-be-it so that god hath creat alle thinges in right ordre, and no-thing with-outen ordre, but alle thinges been ordeyned and nombred; yet nathelees they that been dampned been no-thing in ordre, ne holden noon ordre. / For the erthe ne shal bere hem no fruit. / For, as the prophete David seith: ‘god shal destroie the fruit of the erthe as fro hem;’ ne water ne shal yeve hem no moisture; ne the eyr no refresshing, ne fyr no light. /220 For as seith seint Basilie: ‘the brenninge of the fyr of this world shal god yeven in helle to hem that been dampned; / but the light and the cleernesse shal be yeven in hevene to hise children’; right as the gode man yeveth flesh to hise children, and bones to his houndes. / And for they shullen have noon hope to escape, seith seint Iob atte laste: that ‘ther shal horrour and grisly drede dwellen with-outen ende.’ / Horrour is alwey drede of harm that is to come, and this drede shal evere dwelle in the hertes of hem that been dampned. And therefore han they lorn al hir hope, for sevene causes. / First, for god that is hir Iuge shal be with-outen mercy to hem; ne they may nat plese him, ne noon of hise halwes; ne they ne may yeve no-thing for hir raunson; /225 ne they have no vois to speke to him; ne they may nat flee fro peyne; ne they have no goodnesse in hem, that they mowe shewe to delivere hem fro peyne. / And therfore seith Salomon: ‘the wikked man dyeth; and whan he is deed, he shal have noon hope to escape fro peyne.’ / Who-so thanne wolde wel understande these peynes, and bithinke him weel that he hath deserved thilke peynes for his sinnes, certes, he sholde have more talent to syken and to wepe than for to singen and to pleye. / For as that seith Salomon: ‘who-so that hadde the science to knowe the peynes that been establissed and ordeyned for sinne, he wolde make sorwe.’ / ‘Thilke science,' as seith seint Augustin, 'maketh a man to waymenten in his herte.' /230
166. E. om. 2nd no. 168. Cp. Pt. Ln. repeat (after god) wol nought ben corrupte and therefore saith Salamon. 170. E. Hn. stierne. moot] E. noot. 171. on] E. in. E. Ln. peyne; Cm. pit; rest pyne. 175. E. Hn. in; Hl. to; rest in-to. 178. Hl. oon; Cm. on; E. a; rest oo (o). 182. or] E. Cp. Ln. of. E. Hn. dirk. 188. E. Hn. woot; Cm. wote; Hl. witen; Cp. wite; Ln. weten. 189. Hl. displesen (for despysen). 190. E. om. from ther shal to 2nd greet. 195. E. with the bitter; rest om. the. Hl. teeth (for deeth). 197. E. as of alle; rest om. as. E. (only) smale shetes and the softe shertes. 203. E. om. hem after love. 206. E. om. 1st in helle. 207. Cp. Pt. Ln. Hl. om. after. 208. Cp. Hl. Ln. gruntynge; Cm. grochynge; Pt. gnaistynge. 214. Hl. shal be yiue deth. 218. E. in the ordre. 221. E. Cm. Basilie; rest Basile. 225. E. Cm. and they (1st time). 228. E. the (for these).
§ 11. The fourthe point, that oghte maken a man to have contricion, is the sorweful remembrance of the good that he hath left to doon here in erthe; and eek the good that he hath lorn. / Soothly, the gode werkes that he hath left, outher they been the gode werkes that he wroghte er he fel in-to deedly sinne, or elles the gode werkes that he wroghte while he lay in sinne. / Soothly, the gode werkes, that he dide biforn that he fil in sinne, been al mortified and astoned and dulled by the ofte sinning. / The othere gode werkes, that he wroghte whyl he lay in deedly sinne, they been outrely dede as to the lyf perdurable in hevene. / Thanne thilke gode werkes that been mortified by ofte sinning, whiche gode werkes he dide whyl he was in charitee, ne mowe nevere quiken agayn with-outen verray penitence. /235 And ther-of seith god, by the mouth of Ezechiel: that, ‘if the rightful man returne agayn from his rightwisnesse and werke wikkednesse, shal he live?’ / Nay; for alle the gode werkes that he hath wroght ne shul nevere been in remembrance; for he shal dyen in his sinne. / And up-on thilke chapitre seith seint Gregorie thus: ‘that we shulle understonde this principally; / that whan we doon deedly sinne, it is for noght thanne to rehercen or drawen in-to memorie the gode werkes that we han wroght biforn.’ / For certes, in the werkinge of the deedly sinne, ther is no trust to no good werk that we han doon biforn; that is to seyn, as for to have therby the lyf perdurable in hevene. /240 But nathelees, the gode werkes quiken agayn, and comen agayn, and helpen, and availlen to have the lyf perdurable in hevene, whan we han contricion. / But soothly, the gode werkes that men doon whyl they been in deedly sinne, for-as-muche as they were doon in deedly sinne, they may nevere quiken agayn. / For certes, thing that nevere hadde lyf may nevere quikene; and nathelees, al-be-it that they ne availle noght to han the lyf perdurable, yet availlen they to abregge of the peyne of helle, or elles to geten temporal richesse, / or elles that god wole the rather enlumine and lightne the herte of the sinful man to have repentance; / and eek they availlen for to usen a man to doon gode werkes, that the feend have the lasse power of his soule. /245 And thus the curteis lord Iesu Crist wole that no good werk be lost; for in somwhat it shal availle. / But for-as-muche as the gode werkes that men doon whyl they been in good lyf, been al mortified by sinne folwinge; and eek, sith that alle the gode werkes that men doon whyl they been in deedly synne, been outrely dede as for to have the lyf perdurable; / wel may that man, that no good werke ne dooth, singe thilke newe Frenshe song: “Iay tout perdu mon temps et mon labour.” / For certes, sinne bireveth a man bothe goodnesse of nature and eek the goodnesse of grace. / For soothly, the grace of the holy goost fareth lyk fyr, that may nat been ydel; for fyr faileth anoon as it forleteth his wirkinge, and right so grace fayleth anoon as it forleteth his werkinge. /250 Than leseth the sinful man the goodnesse of glorie, that only is bihight to gode men that labouren and werken. / Wel may he be sory thanne, that oweth al his lif to god as longe as he hath lived, and eek as longe as he shal live, that no goodnesse ne hath to paye with his dette to god, to whom he oweth al his lyf. / For trust wel, ‘he shal yeven acountes,’ as seith seint Bernard, ‘of alle the godes that han be yeven him in this present lyf, and how he hath hem despended; / in so muche that ther shal nat perisse an heer of his heed, ne a moment of an houre ne shal nat perisse of his tyme, that he ne shal yeve of it a rekening.’ /
232. E. Pt. Ln. that he hath wroght (1st time). 233. Ln. mortified; Hl. amortised; rest mortefied. Cp. Pt. astonyed; Hl. astoneyed. 235. Ln. Hl. mortified; rest mortefied. 240. E. is for to seyn. 242. E. quyke. 247. Ln. mortified; Hn. Hl. amortised; rest mortefied. 254. All noght (nat) so; ed. 1550, in so (better).
§ 12. The fifthe thing that oghte moeve a man to contricion, is remembrance of the passion that oure lord Iesu Crist suffred for our sinnes. /255 For, as seith seint Bernard: 'whyl that I live, I shal have remembrance of the travailles that oure lord Crist suffred in preching; / his werinesse in travailling, hise temptacions whan he fasted, hise longe wakinges whan he preyde, hise teres whan that he weep for pitee of good peple; / the wo and the shame and the filthe that men seyden to him; of the foule spitting that men spitte in his face, of the buffettes that men yaven him, of the foule mowes, and of the repreves that men to him seyden; / of the nayles with whiche he was nailed to the croys, and of al the remenant of his passion that he suffred for my sinnes, and no-thing for his gilt.’ / And ye shul understonde, that in mannes sinne is every manere of ordre or ordinance turned up-so-doun. /260 For it is sooth, that god, and reson, and sensualitee, and the body of man been so ordeyned, that everich of thise foure thinges sholde have lordshipe over that other; / as thus: god sholde have lordshipe over reson, and reson over sensualitee, and sensualitee over the body of man. / But sothly, whan man sinneth, al this ordre or ordinance is turned up-so-doun. / And therfore thanne, for-as-muche as the reson of man ne wol nat be subget ne obeisant to god, that is his lord by right, therfore leseth it the lordshipe that it sholde have over sensualitee, and eek over the body of man. / And why? For sensualitee rebelleth thanne agayns reson; and by that wey leseth reson the lordshipe over sensualitee and over the body. /265 For right as reson is rebel to god, right so is bothe sensualitee rebel to reson and the body also. / And certes, this disordinance and this rebellion oure lord Iesu Crist aboghte up-on his precious body ful dere, and herkneth in which wyse. / For-as-muche thanne as reson is rebel to god, therfore is man worthy to have sorwe and to be deed. / This suffred oure lord Iesu Crist for man, after that he hadde be bitraysed of his disciple, and distreyned and bounde, ‘so that his blood brast out at every nail of hise handes,’ as seith seint Augustin. / And forther-over, for-as-muchel as reson of man ne wol nat daunte sensualitee whan it may, therfore is man worthy to have shame; and this suffred oure lord Iesu Crist for man, whan they spetten in his visage. /270 And forther-over, for-as-muchel thanne as the caitif body of man is rebel bothe to reson and to sensualitee, therfore is it worthy the deeth. / And this suffred oure lord Iesu Crist for man up-on the croys, where-as ther was no part of his body free, withouten greet peyne and bitter passion. / And al this suffred Iesu Crist, that nevere forfeted. And therfore resonably may be seyd of Iesu in this manere: ‘to muchel am I peyned for the thinges that I nevere deserved, and to muche defouled for shend-shipe that man is worthy to have.' / And therfore may the sinful man wel seye, as seith seint Bernard: 'acursed be the bitternesse of my sinne, for which ther moste be suffred so muchel bitternesse.’ / For certes, after the diverse discordances of oure wikkednesses, was the passion of Iesu Crist ordeyned in diverse thinges, /275 as thus. Certes, sinful mannes soule is bitraysed of the devel by coveitise of temporel prosperitee, and scorned by deceite whan he cheseth fleshly delyces; and yet is it tormented by inpacience of adversitee, and bispet by servage and subieccion of sinne; and atte laste it is slayn fynally. / For this disordinaunce of sinful man was Iesu Crist first bitraysed, and after that was he bounde, that cam for to unbynden us of sinne and peyne. / Thanne was he biscorned, that only sholde han been honoured in alle thinges and of alle thinges. / Thanne was his visage, that oghte be desired to be seyn of al man-kinde, in which visage aungels desyren to looke, vileynsly bispet. / Thanne was he scourged that no-thing hadde agilt; and fynally, thanne was he crucified and slayn. /280 Thanne was acompliced the word of Isaye: 'he was wounded for oure misdedes, and defouled for oure felonies.’ / Now sith that Iesu Crist took up-on him-self the peyne of alle oure wikkednesses, muchel oghte sinful man wepen and biwayle, that for hise sinnes goddes sone of hevene sholde al this peyne endure. /
255. Hl. for vs and for our synnes. 261. E. Cm. om. so. 269. E. Cm. his blood; rest the blood. 270. Hl. face (for visage). 273. Cm. (and ed. 1550) And therfore . . . manere; rest om. 275. E. disconcordances. 276. E. temporeel. bispet] E. dispeir (!). 277. E. om. first. 281. E. Ysaye that seith that he; rest om. that seith that.
§ 13. The sixte thing that oghte moeve a man to contricion, is the hope of three thynges; that is to seyn, foryifnesse of sinne, and the yifte of grace wel for to do, and the glorie of hevene, with which god shal guerdone a man for hise gode dedes. / And for-as-muche as Iesu Crist yeveth us thise yiftes of his largesse and of his sovereyn bountee, therfore is he cleped Iesus Nazarenus rex Iudeorum. / Iesus is to seyn ‘saveour’ or ‘salvacion,’ on whom men shul hope to have foryifnesse of sinnes, which that is proprely salvacion of sinnes. /285 And therfore seyde the aungel to Ioseph: ‘thou shall clepen his name Iesus, that shal saven his peple of hir sinnes.’ / And heer-of seith seint Peter: ‘ther is noon other name under hevene that is yeve to any man, by which a man may be saved, but only Iesus.’ / Nazarenus is as muche for to seye as ‘florisshinge,’ in which a man shal hope, that he that yeveth him remission of sinnes shal yeve him eek grace wel for to do. For in the flour is hope of fruit in tyme cominge; and in foryifnesse of sinnes hope of grace wel for to do. / ‘I was atte dore of thyn herte,’ seith Iesus, ‘and cleped for to entre; he that openeth to me shal have foryifnesse of sinne. / I wol entre in-to him by my grace, and soupe with him,’ by the goode werkes that he shal doon; whiche werkes been the foode of god; ‘and he shal soupe with me,’ by the grete Ioye that I shal yeven him. /290 Thus shal man hope, for hise werkes of penaunce, that god shall yeven him his regne; as he bihoteth him in the gospel. /
283. E. Hn. gerdone; Cm. gerdounnyn. 285. E. om. is after that. 291. Hn. Cm. Hl. byheteth.
§ 14. Now shal a man understonde, in which manere shal been his contricion. I seye, that it shal been universal and total; this is to seyn, a man shal be verray repentant for alle hise sinnes that he hath doon in delyt of his thoght; for delyt is ful perilous. / For ther been two manere of consentinges; that oon of hem is cleped consentinge of affeccion, when a man is moeved to do sinne, and delyteth him longe for to thinke on that sinne; / and his reson aperceyveth it wel, that it is sinne agayns the lawe of god, and yet his reson refreyneth nat his foul delyt or talent, though he se wel apertly that it is agayns the reverence of god; al-though his reson ne consente noght to doon that sinne in dede, / yet seyn somme doctours that swich delyt that dwelleth longe, it is ful perilous, al be it nevere so lite. /295 And also a man sholde sorwe, namely, for al that evere he hath desired agayn the lawe of god with perfit consentinge of his reson; for ther-of is no doute, that it is deedly sinne in consentinge. / For certes, ther is no deedly sinne, that it nas first in mannes thought, and after that in his delyt; and so forth in-to consentinge and in-to dede. / Wherfore I seye, that many men ne repenten hem nevere of swiche thoghtes and delytes, ne nevere shryven hem of it, but only of the dede of grete sinnes outward. / Wherfore I seye, that swiche wikked delytes and wikked thoghtes been subtile bigyleres of hem that shullen be dampned. / More-over, man oghte to sorwe for hise wikkede wordes as wel as for hise wikkede dedes; for certes, the repentance of a singuler sinne, and nat repente of alle hise othere sinnes, or elles repenten him of alle hise othere sinnes, and nat of a singuler sinne, may nat availle. /300 For certes, god almighty is al good; and ther-fore he foryeveth al, or elles right noght. / And heer-of seith seint Augustin: ‘I woot certainly / that god is enemy to everich sinnere’; and how thanne? He that observeth o sinne, shal he have foryifnesse of the remenaunt of hise othere sinnes? Nay. / And forther-over, contricion sholde be wonder sorweful and anguissous, and therfore yeveth him god pleynly his mercy; and therfore, whan my soule was anguissous with-inne me, I hadde remembrance of god that my preyere mighte come to him. / Forther-over, contricion moste be continuel, and that man have stedefast purpos to shryven him, and for to amenden him of his lyf. /305 For soothly, whyl contricion lasteth, man may evere have hope of foryifnesse; and of this comth hate of sinne, that destroyeth sinne bothe in himself, and eek in other folk, at his power. / For which seith David: ‘ye that loven god hateth wikkednesse.’ For trusteth wel, to love god is for to love that he loveth, and hate that he hateth. /
303. E. om. I woot certeinly. 305. E. continueel.
§ 15. The laste thing that man shal understonde in contricion is this; wher-of avayleth contricion. I seye, that som tyme contricion delivereth a man fro sinne; / of which that David seith: ‘I seye,’ quod David, that is to seyn, ‘I purposed fermely to shryve me; and thow, Lord, relesedest my sinne.’ / And right so as contricion availleth noght, with-outen sad purpos of shrifte, if man have oportunitee, right so litel worth is shrifte or satisfaccion with-outen contricion. /310 And more-over, contricion destroyeth the prison of helle, and maketh wayk and feble alle the strengthes of the develes, and restoreth the yiftes of the holy goost and of alle gode vertues; / and it clenseth the soule of sinne, and delivereth the soule fro the peyne of helle, and fro the companye of the devel, and fro the servage of sinne, and restoreth it to alle godes espirituels, and to the companye and communion of holy chirche. / And forther-over, it maketh him that whylom was sone of ire to be sone of grace; and alle thise thinges been preved by holy writ. / And therfore, he that wolde sette his entente to thise thinges, he were ful wys; for soothly, he ne sholde nat thanne in al his lyf have corage to sinne, but yeven his body and al his herte to the service of Iesu Crist, and ther-of doon him hommage. / For soothly, oure swete lord Iesu Crist hath spared 586us so debonairly in our folies, that if he ne hadde pitee of mannes soule, a sory song we mighten alle singe. /315
308. E. Ln. a man fro; rest om. a. 311. E. fieble. 313. Hl. Pt. Ln. thinges he prouith by. 314. Hl. herte (for entente).
Explicit prima pars Penitentie; et sequitur secunda pars eiusdem.
§ 16. The seconde partie of Penitence is Confession, that is signe of contricion. / Now shul ye understonde what is Confession, and whether it oghte nedes be doon or noon, and whiche thinges been covenable to verray Confession. /
317. E. wheither.
§ 17. First shaltow understonde that Confession is verray shewinge of sinnes to the preest; / this is to seyn ‘verray,’ for he moste confessen him of alle the condiciouns that bilongen to his sinne, as ferforth as he can. / Al moot be seyd, and no thing excused ne hid ne forwrapped, and noght avaunte him of his gode werkes. /320 And forther over, it is necessarie to understonde whennes that sinnes springen, and how they encresen, and whiche they been. /
320. him of his] E. Cm. thee of thy. 321. E. encreessen.
§ 18. Of the springinge of sinnes seith seint Paul in this wise: that ‘right as by a man sinne entred first in-to this world, and thurgh that sinne deeth, right so thilke deeth entred in-to alle men that sinneden.’ / And this man was Adam, by whom sinne entred in-to this world whan he brak the comaundement of god. / And therfore, he that first was so mighty that he sholde not have dyed, bicam swich oon that he moste nedes dye, whether he wolde or noon; and all his progenie in this world that in thilke man sinneden. / Loke that in thestaat of innocence, when Adam and Eve naked weren in paradys, and no-thing ne hadden shame of hir nakednesse, /325 how that the serpent, that was most wyly of alle othere bestes that god hadde maked, seyde to the womman: ‘why comaunded god to yow, ye sholde nat eten of every tree in paradys?’ / The womman answerde: ‘of the fruit,’ quod she, ‘of the trees in paradys we feden us; but soothly, of the fruit of the tree that is in the middel of paradys, god forbad us for to ete, ne nat touchen it, lest per-aventure we should dyen.’ / The serpent seyde to the womman: ‘nay, nay, ye shul nat dyen of deeth; for sothe, god woot, that what day that ye eten ther-of, youre eyen shul opene, and ye shul been as goddes, knowinge 587good and harm.' / The womman thanne saugh that the tree was good to feding, and fair to the eyen, and delytable to the sighte; she tok of the fruit of the tree, and eet it, and yaf to hir housbonde, and he eet; and anoon the eyen of hem bothe openeden. / And whan that they knewe that they were naked, they sowed of fige-leves a manere of breches to hiden hir membres. /330 There may ye seen that deedly sinne hath first suggestion of the feend, as sheweth here by the naddre; and afterward, the delyt of the flesh, as sheweth here by Eve; and after that, the consentinge of resoun, as sheweth here by Adam. / For trust wel, thogh so were that the feend tempted Eve, that is to seyn the flesh, and the flesh hadde delyt in the beautee of the fruit defended, yet certes, til that resoun, that is to seyn, Adam, consented to the etinge of the fruit, yet stood he in thestaat of innocence. / Of thilke Adam toke we thilke sinne original; for of him fleshly descended be we alle, and engendred of vile and corrupt matere. / And whan the soule is put in our body, right anon is contract original sinne; and that, that was erst but only peyne of concupiscence, is afterward bothe peyne and sinne. / And therfore be we alle born sones of wratthe and of dampnacion perdurable, if it nere baptesme that we receyven, which binimeth us the culpe; but for sothe, the peyne dwelleth with us, as to temptacion, which peyne highte concupiscence. /335 Whan it is wrongfully disposed or ordeyned in man, it maketh him coveite, by coveitise of flesh, fleshly sinne, by sighte of hise eyen as to erthely thinges. and coveitise of hynesse by pryde of herte. /
323. E. Hn. comaundementz; rest comaundement. 324. E. wheither. 325. Pt. þe astate; Ln. þe state; Cm. stat. 327. ne] E. and. 328. E. om. ye before shul. 330. E. Cm. a manere; rest in manere. 335. E. bynyneth; Hn. Pt. Hl. bynymeth.
§ 19. Now as for to speken of the firste coveitise, that is, concupiscence after the lawe of oure membres, that weren lawe-fulliche y-maked and by rightful Iugement of god; / I seye, for-as-muche as man is nat obeisaunt to god, that is his lord, therfore is the flesh to him disobeisaunt thurgh concupiscence, which yet is cleped norissinge of sinne and occasion of sinne. / Therfore, al the whyle that a man hath in him the peyne of concupiscence, it is impossible but he be tempted somtyme, and moeved in his flesh to sinne. And this thing may nat faille as longe as he liveth; it may wel wexe feble and faille, by vertu of baptesme and by the grace of god thurgh penitence; /340 but fully ne shal it nevere quenche, that he ne shal som tyme be moeved in him-self, but-if he were al refreyded by siknesse, or by malefice of sorcerie or colde drinkes. / For lo, what seith seint Paul: ‘the flesh coveiteth agayn the spirit, and the spirit agayn the flesh; they been so contrarie and so stryven, that a man may nat alwey doon as he wolde.’ / The same seint Paul, after his grete penaunce in water and in lond (in water by night and by day, in greet peril and in greet peyne, in lond, in famine, in thurst, in cold and clothlees, and ones stoned almost to the deeth) / yet seyde he: ‘allas! I, caytif man, who shal delivere me fro the prisoun of my caytif body?’ / And seint Ierome, whan he longe tyme hadde woned in desert, where-as he hadde no companye but of wilde bestes, where-as he ne hadde no mete but herbes and water to his drinke, ne no bed but the naked erthe, for which his flesh was blak as an Ethiopen for hete and ny destroyed for cold, /345 yet seyde he: that 'the brenninge of lecherie boiled in al his body.' / Wherfore I woot wel sikerly, that they been deceyved that seyn, that they ne be nat tempted in hir body. / Witnesse on Seint Iame the Apostel, that seith: that ‘every wight is tempted in his owen concupiscence’: that is to seyn, that everich of us hath matere and occasion to be tempted of the norissinge of sinne that is in his body. / And therfore seith Seint Iohn the Evaungelist: ‘if that we seyn that we beth with-oute sinne, we deceyve us-selve, and trouthe is nat in us.’ /
338. E. norrissynge. 340. E. fieble; rest feble. 345. E. Ethiopeen; rest -pen.
§ 20. Now shal ye understonde in what manere that sinne wexeth or encreseth in man. The firste thing is thilke norissinge of sinne, of which I spak biforn, thilke fleshly concupiscence. /350 And after that comth the subieccion of the devel, this is to seyn, the develes bely, with which he bloweth in man the fyr of fleshly concupiscence. / And after that, a man bithinketh him whether he wol doon, or no, thilke thing to which he is tempted. / And thanne, if that a man withstonde and weyve the firste entysinge of his flesh and of the feend, thanne is it no sinne; and if it so be that he do nat so, thanne feleth he anon a flambe of delyt. / And thanne is it good to be war, and kepen him wel, or elles he wol falle anon in-to consentinge of sinne; and thanne wol he do it, if he may have tyme and place. / And of this matere seith Moyses by the devel in this manere: 'the feend seith, I wole chace and pursue the man by wikked suggestion, and I wole hente him by moevynge or stiringe of sinne. I wol departe my pryse or my praye by deliberacion, and my lust shal been accompliced in delyt; I wol drawe my swerd in consentinge:' /355 for certes, right as a swerd departeth a thing in two peces, right so consentinge departeth god fro man: ‘and thanne wol I sleen him with myn hand in dede of sinne’; thus seith the feend. / For certes, thanne is a man al deed in soule. And thus is sinne accompliced by temptacion, by delyt, and by consentinge; and thanne is the sin cleped actuel. /
350. E. encreesseth. 352. E. wheither. 357. E. Actueel.
§ 21. For sothe, sinne is in two maneres; outher it is venial, or deedly sinne. Soothly, whan man loveth any creature more than Iesu Crist oure creatour, thanne is it deedly sinne. And venial synne is it, if man love Iesu Crist lasse than him oghte. / For sothe, the dede of this venial sinne is ful perilous; for it amenuseth the love that men sholde han to god more and more. / And therfore, if a man charge him-self with manye swiche venial sinnes, certes, but-if so be that he som tyme descharge him of hem by shrifte, they mowe ful lightly amenuse in him al the love that he hath to Iesu Crist; /360 and in this wise skippeth venial in-to deedly sinne. For certes, the more that a man chargeth his soule with venial sinnes, the more is he enclyned to fallen in-to deedly sinne. / And therfore, lat us nat be necligent to deschargen us of venial sinnes. For the proverbe seith: that manye smale maken a greet. / And herkne this ensample. A greet wawe of the see comth som-tyme with so greet a violence that it drencheth the ship. And the same harm doth som-tyme the smale dropes of water, that entren thurgh a litel crevace in-to the thurrok, and in-to the botme of the ship, if men be so necligent that they ne descharge hem nat by tyme. / And therfore, al-thogh ther be a difference bitwixe thise two causes of drenchinge, algates the ship is dreynt. / Right so fareth it somtyme of deedly sinne, and of anoyouse veniale sinnes, whan they multiplye in a man so greetly, that thilke worldly thinges that he loveth, thurgh whiche he sinneth venially, is as greet in his herte as the love of god, or more. /365 And therfore, the love of every thing, that is nat biset in god ne doon principally for goddes sake, al-though that a man love it lasse than god, yet is it venial sinne; / and deedly sinne, whan the love of any thing weyeth in the herte of man as muchel as the love of god, or more. / ‘Deedly sinne,’ as seith seint Augustin, ‘is, whan a man turneth his herte fro god, which that is verray sovereyn bountee, that may nat chaunge, and yeveth his herte to thing that may chaunge and flitte’; / and certes, that is every thing, save god of hevene. For sooth is, that if a man yeve his love, the which that he oweth al to god with al his herte, un-to a creature, certes, as muche of his love as he yeveth to thilke creature, so muche he bireveth fro god; / and therfore doth he sinne. For he, that is dettour to god, ne yeldeth nat to god al his dette, that is to seyn, al the love of his herte. /370
358. E. om. oghte. 361. sinnes] E. sinne. 363. E. Hn. Cm. in the botme. 367. E. wexeth (for weyeth). 369. E. as he yeueth of his loue.
§ 22. Now sith man understondeth generally, which is venial sinne, thanne is it covenable to tellen specially of sinnes whiche that many a man per-aventure ne demeth hem nat sinnes, and ne shryveth him nat of the same thinges; and yet nathelees they been sinnes. / Soothly, as thise clerkes wryten, this is to seyn, that at every tyme that a man eteth or drinketh more than suffyseth to the sustenaunce of his body, in certein he dooth sinne. / And eek whan he speketh more than nedeth, it is sinne. Eke whan he herkneth nat benignely the compleint of the povre. / Eke whan he is in hele of body and wol nat faste, whan othere folk faste, withouten cause resonable. Eke whan he slepeth more than nedeth, or whan he comth by thilke enchesoun to late to chirche, or to othere werkes of charite. / Eke whan he useth his wyf, withouten sovereyn desyr of engendrure, to the honour of god, or for the entente to yelde to his wyf the dette of his body. /375 Eke whan he wol nat visite the sike and the prisoner, if he may. Eke if he love wyf or child, or other worldly thing, more than resoun requyreth. Eke if he flatere or blandishe more than him oghte for any necessitee. / Eke if he amenuse or withdrawe the almesse of the povre. Eke if he apparailleth his mete more deliciously than nede is, or ete it to hastily by likerousnesse. / Eke if he tale vanitees at chirche or at goddes service, or that he be a talker ot ydel wordes of folye or of vileinye; for he shal yelden acountes of it at the day of dome. / Eke whan he biheteth or assureth to do 591thinges that he may nat perfourne. Eke whan that he, by lightnesse or folie, misseyeth or scorneth his neighebore. / Eke whan he hath any wikked suspecion of thing, ther he ne woot of it no soothfastnesse. /380 Thise thinges and mo with-oute nombre been sinnes, as seith seint Augustin. /
371. E. Cp. Pt. Ln. hem (for him). 374. E. hym oghte (for othere folk). 376. E. Hn. blandise. 377. Hl. body (for mete). E. Cm. om. it. 378. Hl. talke of (for tale). 379. Hn. Hl. acounte.
Now shal men understonde, that al-be-it so that noon erthely man may eschue alle venial sinnes, yet may he refreyne him by the brenninge love that he hath to oure lord Iesu Crist, and by preyeres and confession and othere gode werkes, so that it shal but litel greve. / For, as seith seint Augustin: ‘if a man love god in swiche manere, that al that evere he doth is in the love of god, and for the love of god verraily, for he brenneth in the love of god: / loke, how muche that a drope of water that falleth in a fourneys ful of fyr anoyeth or greveth, so muche anoyeth a venial sinne un-to a man that is parfit in the love of Iesu Crist.’ / Men may also refreyne venial sinne by receyvinge worthily of the precious body of Iesu Crist; /385 by receyving eek of holy water; by almesdede; by general confession of Confiteor at masse and at complin; and by blessinge of bisshopes and of preestes, and by othere gode werkes. /
382. E. restreyne (for refreyne); see 385. 386. E. om. by before othere.
Explicit secunda pars Penitentie.
Sequitur de Septem Peccatis Mortalibus et eorum dependenciis circumstanciis et speciebus.
§ 23. Now is it bihovely thing to telle whiche been the deedly sinnes, this is to seyn, chieftaines of sinnes; alle they renne in o lees, but in diverse maneres. Now been they cleped chieftaines for-as-muche as they been chief, and springers of alle othere sinnes. / Of the roote of thise sevene sinnes thanne is Pryde, the general rote of alle harmes; for of this rote springen certein braunches, as Ire, Envye, Accidie or Slewthe, Avarice or Coveitise (to commune understondinge), Glotonye, and Lecherye. / And everich of thise chief sinnes hath hise braunches and hise twigges, as shal be declared in hir chapitres folwinge. /
Heading. So in E.; but E. adds De Superbia, which should come at the head of § 24, as in Hn. 387. Hl. springers; Hn. sprynge; E. Pt. Ln. spryngen.
§ 24. And thogh so be that no man can outrely telle the nombre of the twigges and of the harmes that cometh of Pryde, yet wol I shewe a partie of hem, as ye shul understonde. /390 Ther is Inobedience, Avauntinge, Ipocrisie, Despyt, Arrogance, Impudence, Swellinge of herte, Insolence, Elacion, Impacience, Strif, Contumacie, Presumpcion, Irreverence, Pertinacie, Veyne Glorie; and many another twig that I can nat declare. / Inobedient, is he that disobeyeth for despyt to the comandements of god and to hise sovereyns, and to his goostly fader. / Avauntour, is he that bosteth of the harm or of the bountee that he hath doon. / Ipocrite, is he that hydeth to shewe him swiche as he is, and sheweth him swiche as he noght is. / Despitous, is he that hath desdeyn of his neighebore, that is to seyn, of his evene-cristene, or hath despyt to doon that him oghte to do. /395 Arrogant, is he that thinketh that he hath thilke bountees in him that he hath noght, or weneth that he sholde have hem by hise desertes; or elles he demeth that he be that he nis nat. / Impudent, is he that for his pride hath no shame of hise sinnes. / Swellinge of herte, is whan a man reioyseth him of harm that he hath doon. / Insolent, is he that despyseth in his Iugement alle othere folk as to regard of his value, and of his conning, and of his speking, and of his bering. / Elacion, is whan he ne may neither suffre to have maister ne felawe. /400 Impacient, is he that wol nat been y-taught ne undernome of his vyce, and by stryf werreieth trouthe witingly, and deffendeth his folye. / Contumax, is he that thurgh his indignacion is agayns everich auctoritee or power of hem that been hise sovereyns. / Presumpcion, is whan a man undertaketh an empryse that him oghte nat do, or elles that he may nat do; and that is called Surquidrie. Irreverence, is whan men do nat honour thereas hem oghte to doon, and waiten to be reverenced. / Pertinacie, is whan man deffendeth his folye, and trusteth to muchel in his owene wit. / Veyne glorie, is for to have pompe and delyt in his temporel hynesse, and glorifie him in this worldly estaat. /405 Ianglinge, is whan men speken to muche biforn folk, and clappen as a mille, and taken no kepe what they seye. /
390. E. Hn. om. 2nd the. 391. Pt. Hl. Imprudence; E. Hn. Inpudence. E. Hn. Pt. Inpatience; rest imperfect here. 395. E. om. 2nd his. 401. Ln. Hl. Impacient; rest Inpatient (or imperfect). Pt. Hl. vices. 403. E. and this is. E. Hn. surquidie. 404. E. hise folies. 405. E. temporeel.
§ 25. And yet is ther a privee spece of Pryde, that waiteth first to be salewed er he wole salewe, al be he lasse worth than that other is, per-aventure; and eek he waiteth or desyreth to sitte, or elles to goon above him in the wey, or kisse pax, or been encensed, or goon to offring biforn his neighebore, / and swiche semblable thinges; agayns his duetee, per-aventure, but that he hath his herte and his entente in swich a proud desyr to be magnifyed and honoured biforn the peple. /
§ 26. Now been ther two maneres of Pryde; that oon of hem is with-inne the herte of man, and that other is with-oute. / Of whiche soothly thise forseyde thinges, and mo than I have seyd, apertenen to pryde that is in the herte of man; and that othere speces of pryde been with-oute. /410 But natheles that oon of thise speces of pryde is signe of that other, right as the gaye leefsel atte taverne is signe of the wyn that is in the celer. / And this is in manye thinges: as in speche and contenaunce, and in outrageous array of clothing; / for certes, if ther ne hadde be no sinne in clothing, Crist wolde nat have noted and spoken of the clothing of thilke riche man in the gospel. / And, as seith Seint Gregorie, that precious clothing is coupable for the derthe of it, and for his softenesse, and for his strangenesse and degysinesse, and for the superfluitee, or for the inordinat scantnesse of it. / Allas! may men nat seen, as in oure dayes, the sinful costlewe array of clothinge, and namely in to muche superfluitee, or elles in to desordinat scantnesse? /415
410. So E. Hn. Hl.; perhaps read and that other spece of pryde is; Pt. Ln. and ther-to other spices of pride bene. 411. Pt. Ln. Hl. spices. Hn. leuesel; Hl. leuesselle; Pt. leeuesell; Ln. leuesal. 414. Pt. disgisenesse; Ln. Hl. disgisinesse. or] E. and.
§ 27. As to the firste sinne, that is in superfluitee of clothinge, which that maketh it so dere, to harm of the peple; / nat only the cost of embroudinge, the degyse endentinge or barringe, oundinge, palinge, windinge, or bendinge, and semblable wast of clooth in vanitee; / but ther is also costlewe furringe in hir gounes, so muche pounsoninge of chisels to maken holes, so muche dagginge of sheres; / forth-with the superfluitee in lengthe of the forseide gounes, trailinge in the dong and in the myre, on horse and eek on fote, as wel of man as of womman, that al thilke trailing is verraily as in effect wasted, consumed, thredbare, and roten with donge, rather than it is yeven to the povre; to greet damage of the forseyde povre folk. / And that in sondry wyse: this is to seyn, that the more that clooth is wasted, the more it costeth to the peple for the scantnesse; /420 and forther-over, if so be that they wolde yeven swich pounsoned and dagged clothing to the povre folk, it is nat convenient to were for hir estaat, ne suffisant to bete hir necessitee, to kepe hem fro the distemperance of the firmament. / Upon that other syde, to speken of the horrible disordinat scantnesse of clothing, as been thise cutted sloppes or hainselins, that thurgh hir shortnesse ne covere nat the shameful membres of man, to wikked entente. / Allas! somme of hem shewen the boce of hir shap, and the horrible swollen membres, that semeth lyk the maladie of hirnia, in the wrappinge of hir hoses; / and eek the buttokes of hem faren as it were the hindre part of a she-ape in the fulle of the mone. / And more-over, the wrecched swollen membres that they shewe thurgh the degysinge, in departinge of hir hoses in whyt and reed, semeth that half hir shameful privee membres weren flayn. /425 And if so be that they departen hire hoses in othere colours, as is whyt and blak, or whyt and blew, or blak and reed, and so forth; / thanne semeth it, as by variance of colour, that half the partie of hir privee membres were corrupt by the fyr of seint Antony, or by cancre, or by other swich meschaunce. / Of the hindre part of hir buttokes, it is ful horrible for to see. For certes, in that partie of hir body ther-as they purgen hir stinkinge ordure, / that foule partie shewe they to the peple proudly in despyt of honestetee, the which honestetee that Iesu Crist and hise freendes observede to shewen in hir lyve. / Now as of the outrageous array of wommen, god woot, that though the visages of somme of hem seme ful chaast and debonaire, yet notifie they in hir array of atyr likerousnesse and pryde. /430 I sey nat that honestetee in clothinge of man or womman is uncovenable, but certes the superfluitee or disordinat scantitee of clothinge is reprevable. / Also the sinne of aornement or of apparaille is in thinges that apertenen to rydinge, as in to manye delicat horses that been holden for delyt, that been so faire, fatte, and costlewe; / and also to many a vicious knave that is sustened by cause of hem; in to curious harneys, as in sadeles, in crouperes, peytrels, and brydles covered with precious clothing and riche, barres and plates of gold and of silver. / For which god seith by Zakarie the prophete, ‘I wol confounde the ryderes of swiche horses.’ / This folk taken litel reward of the rydinge of goddes sone of hevene, and of his harneys whan he rood up-on the asse, and ne hadde noon other harneys but the povre clothes of hise disciples; ne we ne rede nat that evere he rood on other beest. /435 I speke this for the sinne of superfluitee, and nat for reasonable honestetee, whan reson it requyreth. / And forther, certes pryde is greetly notified in holdinge of greet meinee, whan they be of litel profit or of right no profit. / And namely, whan that meinee is felonous and damageous to the peple, by hardinesse of heigh lordshipe or by wey of offices. / For certes, swiche lordes sellen thanne hir lordshipe to the devel of helle, whanne they sustenen the wikkednesse of hir meinee. / Or elles whan this folk of lowe degree, as thilke that holden hostelries, sustenen the thefte of hir hostilers, and that is in many manere of deceites. /440 Thilke manere of folk been the flyes that folwen the hony, or elles the houndes that folwen the careyne. Swiche forseyde folk stranglen spiritually hir lordshipes; / for which thus seith David the prophete, ‘wikked deeth mote come up-on thilke lordshipes, and god yeve that they mote descenden in-to helle al doun; for in hir houses been iniquitees and shrewednesses,’ and nat god of hevene. / And certes, but-if they doon amendement, right as god yaf his benison to Laban by the service of Iacob, and to Pharao by the service of Joseph, right so god wol yeve his malison to swiche lordshipes as sustenen the wikkednesse of hir servaunts, but-if they come to amendement. / Pryde of the table appereth eek ful ofte; for certes, riche men been cleped to festes, and povre folk been put awey and rebuked. / Also in excesse of diverse metes and drinkes; and namely, swiche manere bake metes and dish-metes, brenninge of wilde fyr, and peynted and castelled with papir, and semblable wast; so that it is abusion for to thinke. /445 And eek in to greet preciousnesse of vessel and curiositee of minstralcie, by whiche a man is stired the more to delyces of luxurie, / if so be that he sette his herte the lasse up-on oure lord Iesu Crist, certein it is a sinne; and certeinly the delyces mighte been so grete in this caas, that man mighte lightly falle by hem in-to deedly sinne. / The especes that sourden of pryde, soothly whan they sourden of malice ymagined, avysed, and forncast, or elles of usage, been deedly synnes, it is no doute. / And whan they sourden by freletee unavysed sodeinly, and sodeinly withdrawen ayein, al been they grevouse sinnes, I gesse that they ne been nat deedly. / Now mighte men axe wher-of that Pryde sourdeth and springeth, and I seye: somtyme it springeth of the goodes of nature, and som-tyme of the goodes of fortune, and som-tyme of the goodes of grace. /450 Certes, the goodes of nature stonden outher in goodes of body or in goodes of soule. / Certes, goodes of body been hele of body, as strengthe, delivernesse, beautee, gentrye, franchise. / Goodes of nature of the soule been good wit, sharp understondynge, subtil engin, vertu naturel, good memorie. / Goodes of fortune been richesses, highe degrees of lordshipes, preisinges of the peple. / Goodes of grace been science, power to suffre spirituel travaille, benignitee, vertuous contemplacion, withstondinge of temptacion, and semblable thinges. /455 Of whiche forseyde goodes, certes it is a ful greet folye a man to pryden him in any of hem alle. / Now as for to speken of goodes of nature, god woot that som-tyme we han hem in nature as muche to oure damage as to oure profit. / As, for to speken of hele of body; certes it passeth ful lightly, and eek it is ful ofte encheson of the siknesse of oure soule; for god woot, the flesh is a ful greet enemy to the soule: and therfore, the more that the body is hool, the more be we in peril to falle. / Eke for to pryde him in his strengthe of body, it is an heigh folye; for certes, the flesh coveiteth agayn the spirit, and ay the more strong that the flesh is, the sorier may the soule be: / and, over al this, strengthe of body and worldly hardinesse causeth ful ofte many a man to peril and meschaunce. /460 Eek for to pryde him of his gentrye is ful greet folye; for ofte tyme the gentrye of the body binimeth the gentrye of the soule; and eek we ben alle of o fader and of o moder; and alle we been of o nature roten and corrupt, both riche and povre. / For sothe, o manere gentrye is for to preise, that apparailleth mannes corage with vertues and moralitees, and maketh him Cristes child. / For truste wel, that over what man sinne hath maistrie, he is a verray cherl to sinne. /
416. E. om. that is. 417. Hn. Pt. enbrawdynge. E. om. or bef. barringe. E. owndynge. 418. E. powsonynge; Hn. pownsonynge; Ln. pounseinge; Hl. pounsyng. Pt. chisels; E. Hn. chisel; rest chiseles (cheseles). 419. E. men; wommen. 421. E. powsoned; Hn. pownsonyd; Pt. pounsoned; Ln. Hl. pounsed. 422. E. haynselyns; Hn. hanselyns; Ln. hanslynes; Pt. hanselynes; Hl. anslets; Harl. 1758, haunseleynys. 425. All but E. om. the bef. degysinge. E. flayne. 429. E. honestitee (twice); Hn. honestetee; rest honeste; so in 431, 436. 430. E. om. as. 432. Pt. anornement; Hl. here ornament. 440. E. sustenynge; Hn. sustenen; Cm. Hl. susteyne. 442. E. vp; Hn. vp on; Hl. vpon; Pt. Ln. on. E. al doun (twice); Hn. adown (twice); Cm. al doun (once). 443. All Mss. transpose Laban and Pharao. E. seruauntz. 448. Pt. Ln. Hl. espices. 449. E. om. 1st sodeinly. 452. E. gentries; Hl. Pt. gentrie; rest genterye; see 461. 453. E. natureel. 454. E. Ln. richesse. 455. E. spiritueel. 460. So in all.
§ 28. Now been ther generale signes of gentilesse; as eschewinge of vyce and ribaudye and servage of sinne, in word, in werk, and contenance; / and usinge vertu, curteisye, and clennesse, and to be liberal, that is to seyn, large by mesure; for thilke that passeth mesure is folye and sinne. /465 Another is, to remembre him of bountee that he of other folk hath receyved. / Another is, to be benigne to hise goode subgetis; wherfore, as seith Senek, ‘ther is no-thing more covenable to a man of heigh estaat than debonairetee and pitee. / And therfore thise flyes that men clepeth bees, whan they maken hir king, they chesen oon that hath no prikke wherwith he may stinge.’ / Another is, a man to have a noble herte and a diligent, to attayne to heighe vertuouse thinges. / Now certes, a man to pryde him in the goodes of grace is eek an outrageous folye; for thilke yiftes of grace that sholde have turned him to goodnesse and to medicine, turneth him to venim and to confusion, as seith seint Gregorie. /470 Certes also, who-so prydeth him in the goodes of fortune, he is a ful greet fool; for som-tyme is a man a greet lord by the morwe, that is a caitif and a wrecche er it be night: / and somtyme the richesse of a man is cause of his deeth; somtyme the delyces of a man is cause of the grevous maladye thurgh which he dyeth. / Certes, the commendacion of the peple is somtyme ful fals and ful brotel for to triste; this day they preyse, tomorwe they blame. / God woot, desyr to have commendacion of the peple hath caused deeth to many a bisy man. /
467. E. Cm. om. as. 469. E. man; rest a man. 470. E. yifte; rest yiftes. N.B. Section 470 follows 474 in Hn. Pt.; see note.
Remedium contra peccatum Superbie.
§ 29. Now sith that so is, that ye han understonde what is pryde, and whiche been the speces of it, and whennes pride sourdeth and springeth; /475 now shul ye understonde which is the remedie agayns the sinne of pryde, and that is, humilitee or mekenesse. / That is a vertu, thurgh which a man hath verray knoweleche of him-self, and holdeth of him-self no prys ne deyntee as in regard of hise desertes, consideringe evere his freletee. / Now 598been ther three maneres of humilitee; as humilitee in herte, and another humilitee in his mouth; the thridde in hise werkes. / The humilitee in herte is in foure maneres: that oon is, whan a man holdeth him-self as noght worth biforn god of hevene. Another is, whan he ne despyseth noon other man. / The thridde is, whan he rekketh nat thogh men holde him noght worth. The ferthe is, whan he nis nat sory of his humiliacion. /480 Also, the humilitee of mouth is in foure thinges: in attempree speche, and in humblesse of speche, and whan he biknoweth with his owene mouth that he is swich as him thinketh that he is in his herte. Another is, whan he preiseth the bountee of another man, and nothing ther-of amenuseth. / Humilitee eek in werkes is in foure maneres: the firste is, whan he putteth othere men biforn him. The seconde is, to chese the loweste place over-al. The thridde is, gladly to assente to good conseil. / The ferthe is, to stonde gladly to the award of hise sovereyns, or of him that is in hyer degree; certein, this is a greet werk of humilitee. /
482. E. om. good.
Sequitur de Inuidia.
§ 30. After Pryde wol I speken of the foule sinne of Envye, which is, as by the word of the philosophre, sorwe of other mannes prosperitee; and after the word of seint Augustin, it is sorwe of other mannes wele, and Ioye of othere mennes harm. / This foule sinne is platly agayns the holy goost. Al-be-it so that every sinne is agayns the holy goost, yet nathelees, for as muche as bountee aperteneth proprely to the holy goost, and Envye comth proprely of malice, therfore it is proprely agayn the bountee of the holy goost. /485 Now hath malice two speces, that is to seyn, hardnesse of herte in wikkednesse, or elles the flesh of man is so blind, that he considereth nat that he is in sinne, or rekketh nat that he is in sinne; which is the hardnesse of the devel. / That other spece of malice is, whan a man werreyeth trouthe, whan he woot that it is trouthe. And eek, whan he werreyeth the grace that god hath yeve to his neighebore; and al this is by Envye. / Certes, thanne is Envye the worste sinne that is. For soothly, alle othere sinnes been som-tyme only agayns o special vertu; / but certes, Envye is agayns alle vertues and agayns alle goodnesses; for it is 599sory of alle the bountees of his neighebore; and in this manere it is divers from alle othere sinnes. / For wel unnethe is ther any sinne that it ne hath som delyt in itself, save only Envye, that evere hath in itself anguish and sorwe. /490 The speces of Envye been thise: ther is first, sorwe of other mannes goodnesse and of his prosperitee; and prosperitee is kindely matere of Ioye; thanne is Envye a sinne agayns kinde. / The seconde spece of Envye is Ioye of other mannes harm; and that is proprely lyk to the devel, that evere reioyseth him of mannes harm. / Of thise two speces comth bakbyting; and this sinne of bakbyting or detraccion hath certeine speces, as thus. Som man preiseth his neighebore by a wikke entente; / for he maketh alwey a wikked knotte atte laste ende. Alwey he maketh a ‘but’ atte laste ende, that is digne of more blame, than worth is al the preisinge. / The seconde spece is, that if a man be good and dooth or seith a thing to good entente, the bakbyter wol turne all thilke goodnesse up-so-doun to his shrewed entente. /495 The thridde is, to amenuse the bountee of his neighebore. / The fourthe spece of bakbyting is this; that if men speke goodnesse of a man, thanne wol the bakbyter seyn, ‘parfey, swich a man is yet bet than he’; in dispreisinge of him that men preise. / The fifte spece is this; for to consente gladly and herkne gladly to the harm that men speke of other folk. This sinne is ful greet, and ay encreseth after the wikked entente of the bakbyter. / After bakbyting cometh grucching or murmuracion; and somtyme it springeth of inpacience agayns god, and somtyme agayns man. / Agayns god it is, whan a man gruccheth agayn the peynes of helle, or agayns poverte, or los of catel, or agayn reyn or tempest; or elles gruccheth that shrewes han prosperitee, or elles for that goode men han adversitee. /500 And alle thise thinges sholde men suffre paciently, for they comen by the rightful Iugement and ordinance of god. / Som-tyme comth grucching of avarice; as Iudas grucched agayns the Magdaleyne, whan she enoynte the heved of oure lord Iesu Crist with hir precious oynement. / This maner murmure is swich as whan man gruccheth of goodnesse that him-self dooth, or that other folk doon of hir owene catel. / Som-tyme comth murmure of pryde; as whan Simon the Pharisee grucched agayn the Magdaleyne, whan she approched to Iesu Crist, and weep at his feet for hir sinnes. / And somtyme grucching sourdeth of Envye; whan men discovereth a mannes harm that was privee, or bereth him on hond thing that is fals. /505 Murmure eek is ofte amonges servaunts, that grucchen whan hir sovereyns bidden hem doon leveful thinges; / and, for-as-muche as they dar nat openly withseye the comaundements of hir sovereyns, yet wol they seyn harm, and grucche, and murmure prively for verray despyt; / whiche wordes men clepen the develes Pater-noster, though so be that the devel ne hadde nevere Pater-noster, but that lewed folk yeven it swich a name. / Som tyme grucching comth of ire or prive hate, that norisseth rancour in herte, as afterward I shal declare. / Thanne cometh eek bitternesse of herte; thurgh which bitternesse every good dede of his neighebor semeth to him bitter and unsavory. /510 Thanne cometh discord, that unbindeth alle manere of frendshipe. Thanne comth scorninge, as whan a man seketh occasioun to anoyen his neighebor, al do he never so weel. / Thanne comth accusinge, as whan man seketh occasion to anoyen his neighebor, which that is lyk to the craft of the devel, that waiteth bothe night and day to accusen us alle. / Thanne comth malignitee, thurgh which a man anoyeth his neighebor prively if he may; / and if he noght may, algate his wikked wil ne shal nat wante, as for to brennen his hous prively, or empoysone or sleen hise bestes, and semblable thinges. /
485. E. om. foule. E. om. 1st and 3rd goost. 486. Cm. hardynesse (twice). 487. E. speche (for spece); Hn. spece; rest spice. E. malice (and so Selden MS., rightly); rest enuye. 497. parfey] E. pardee. 500. E. om. or after catel. 502. E. Hn. enoynte; Cm. Hl. anoynted; Pt. ennoynted. 506. E. seruauntz. Cm. lefful; Pt. Hl. leeful. 507. E. comaundementz. 511. Cm. scornynge as whanne a man sekyth occasioun to anoyen his; rest scornynge of his (merely).
Remedium contra peccatum Inuidie.
§ 31. Now wol I speke of the remedie agayns this foule sinne of Envye. First, is the love of god principal, and loving of his neighebor as him-self; for soothly, that oon ne may nat been withoute that other. /515 And truste wel, that in the name of thy neighebore thou shalt understonde the name of thy brother; for certes alle we have o fader fleshly, and o moder, that is to seyn, Adam and Eve; and eek o fader espirituel, and that is god of hevene. / Thy neighebore artow holden for to love, and wilne him alle goodnesse; and therfore seith god, ‘love thy neighebore as thyselve,’ that is to seyn, to salvacion bothe of lyf and of soule. / And more-over, thou shalt love him in word, and in benigne amonestinge, and chastysinge; and conforten him in hise anoyes, and preye for him with al thyn herte. / And in dede thou shall love him in swich wyse, that thou shalt doon to him in charitee as thou woldest that it were doon to thyn owene persone. / And therfore, thou ne shalt doon him no damage in wikked word, ne harm in his body, ne in his catel, ne in his soule, by entysing of wikked ensample. /520 Thou shalt nat desyren his wyf, ne none of hise thinges. Understond eek, that in the name of neighebor is comprehended his enemy. / Certes man shal loven his enemy by the comandement of god; and soothly thy frend shaltow love in God. / I seye, thyn enemy shaltow love for goddes sake, by his comandement. For if it were reson that a man sholde haten his enemy, for sothe god nolde nat receiven us to his love that been hise enemys. / Agayns three manere of wronges that his enemy dooth to hym, he shal doon three thinges, as thus. / Agayns hate and rancour of herte, he shal love him in herte. Agayns chyding and wikkede wordes, he shal preye for his enemy. And agayn the wikked dede of his enemy, he shal doon him bountee. /525 For Crist seith, 'loveth youre enemys, and preyeth for hem that speke yow harm; and eek for hem that yow chacen and pursewen, and doth bountee to hem that yow haten.’ Lo, thus comaundeth us oure lord Iesu Crist, to do to oure enemys. / For soothly, nature dryveth us to loven oure freendes, and parfey, oure enemys han more nede to love than oure freendes; and they that more nede have, certes, to hem shal men doon goodnesse; / and certes, in thilke dede have we remembrance of the love of Iesu Crist, that deyde for hise enemys. / And in-as-muche as thilke love is the more grevous to perfourne, in-so-muche is the more gretter the merite; and therfore the lovinge of oure enemy hath confounded the venim of the devel. / For right as the devel is disconfited by humilitee, right so is he wounded to the deeth by love of oure enemy. /530 Certes, thanne is love the medicine that casteth out the venim of Envye fro mannes herte. / The speces of this pas shullen be more largely in hir chapitres folwinge declared. /
515. this] E. the. love] E. louynge. 516. E. espiritueel. 517. E. om. bothe. 520. E. entissyng. 521. E. Hn. Vnderstoond. 524. wronges] E. thinges. 525. E. om. the. 529. Ln. Hl. parforme; Pt. perfourme. 532. E. paas; Hl. part; rest pas.
Sequitur de Ira.
§ 32. After Envye wol I discryven the sinne of Ire. For soothly, who-so hath envye upon his neighebor, anon he wole comunly finde him a matere of wratthe, in word or in dede, agayns him to whom he hath envye. / And as wel comth Ire of Pryde, as of Envye; for soothly, he that is proude or envious is lightly wrooth. /
533. Hn. Pt. Ln. om. a bef. matere.
§ 33. This sinne of Ire, after the discryving of seint Augustin, is wikked wil to been avenged by word or by dede. /535 Ire, after the philosophre, is the fervent blood of man y-quiked in his herte, thurgh which he wole harm to him that he hateth. / For certes the herte of man, by eschaufinge and moevinge of his blood, wexeth so trouble, that he is out of alle Iugement of resoun. / But ye shal understonde that Ire is in two maneres; that oon of hem is good, and that other is wikked. / The gode Ire is by Ialousye of goodnesse, thurgh which a man is wrooth with wikkednesse and agayns wikkednesse; and therfore seith a wys man, that ‘Ire is bet than pley.’ / This Ire is with debonairetee, and it is wrooth withouten bitternesse; nat wrooth agayns the man, but wrooth with the misdede of the man; as seith the prophete David, Irascimini et nolite peccare. /540 Now understondeth, that wikked Ire is in two maneres, that is to seyn, sodeyn Ire or hastif Ire, withouten avisement and consentinge of resoun. / The mening and the sens of this is, that the resoun of man ne consente nat to thilke sodeyn Ire; and thanne it is venial. / Another Ire is ful wikked, that comth of felonye of herte avysed and cast biforn; with wikked wil to do vengeance, and therto his resoun consenteth; and soothly this is deedly sinne. / This Ire is so displesant to god, that it troubleth his hous and chaceth the holy goost out of mannes soule, and wasteth and destroyeth the lyknesse of god, that is to seyn, the vertu that is in mannes soule; / and put in him the lyknesse of the devel, and binimeth the man fro god that is his rightful lord. /545 This Ire is a ful greet plesaunce to the devel; for it is the develes fourneys, that is eschaufed with the fyr of helle. / For certes, right so as fyr is more mighty to destroyen erthely thinges than any other element, right so Ire is mighty to destroyen alle spirituel thinges. / Loke how that fyr of smale gledes, that been almost dede under asshen, wollen quike agayn whan they been touched with brimstoon; right so Ire wol everemo quiken agayn, whan it is touched by the pryde that is covered in mannes herte. / For certes fyr ne may nat comen out of no-thing, but-if it were first in the same thing naturelly; as fyr is drawen out of flintes 603with steel. / And right so as pryde is ofte tyme matere of Ire, right so is rancour norice and keper of Ire. /550 Ther is a maner tree, as seith seint Isidre, that whan men maken fyr of thilke tree, and covere the coles of it with asshen, soothly the fyr of it wol lasten al a yeer or more. / And right so fareth it of rancour; whan it is ones conceyved in the hertes of som men, certein, it wol lasten peraventure from oon Estre-day unto another Estre-day, and more. / But certes, thilke man is ful fer fro the mercy of god al thilke while. /
547. E. spiritueel. 549. E. natureelly. 551. E. fire. 553. E. in (for al).
§ 34. In this forseyde develes fourneys ther forgen three shrewes: Pryde, that ay bloweth and encreseth the fyr by chydinge and wikked wordes. / Thanne stant Envye, and holdeth the hote iren upon the herte of man with a peire of longe tonges of long rancour. /555 And thanne stant the sinne of contumelie or stryf and cheeste, and batereth and forgeth by vileyns reprevinges. / Certes, this cursed sinne anoyeth bothe to the man him-self and eek to his neighebor. For soothly, almost al the harm that any man dooth to his neighebore comth of wratthe. / For certes, outrageous wratthe doth al that evere the devel him comaundeth; for he ne spareth neither Crist, ne his swete mooder. / And in his outrageous anger and Ire, allas! allas! ful many oon at that tyme feleth in his herte ful wikkedly, bothe of Crist and of alle hise halwes. / Is nat this a cursed vice? Yis, certes. Allas! it binimeth from man his wit and his resoun, and al his debonaire lyf espirituel that sholde kepen his soule. /560 Certes, it binimeth eek goddes due lordshipe, and that is mannes soule, and the love of hise neighebores. It stryveth eek alday agayn trouthe. It reveth him the quiete of his herte, and subverteth his soule. /
554. E. encreesseth. 555. E. toonges. 558. Hl. om. swete. 560. E. espiritueel.
§ 35. Of Ire comen thise stinkinge engendrures: first hate, that is old wratthe; discord, thurgh which a man forsaketh his olde freend that he hath loved ful longe. / And thanne cometh werre, and every manere of wrong that man dooth to his neighebore, in body or in catel. / Of this cursed sinne of Ire cometh eek manslaughtre. And understonde wel, that homicyde, that is manslaughtre, is in dyverse wyse. Som manere of homicyde is spirituel, and som is bodily. / Spirituel manslaughtre is in six thinges. First, by hate; as seint Iohn seith, 'he that hateth his brother is homicyde.' /565 Homicyde is eek by bakbytinge; of whiche bakbyteres seith Salomon, that 'they han two swerdes with whiche they sleen hir neighebores.’ For soothly, as wikke is to binime his good name as his lyf. / Homicyde is eek, in yevinge of wikked conseil by fraude; as for to yeven conseil to areysen wrongful custumes and taillages. / Of whiche seith Salomon, ‘Leon rorynge and bere hongry been lyke to the cruel lordshipes,’ in withholdinge or abregginge of the shepe (or the hyre), or of the wages of servaunts, or elles in usure or in withdrawinge of the almesse of povre folk. / For which the wyse man seith, ‘fedeth him that almost dyeth for honger’; for soothly, but-if thou fede him, thou sleest him; and alle thise been deadly sinnes. / Bodily manslaughtre is, whan thow sleest him with thy tonge in other manere; as whan thou comandest to sleen a man, or elles yevest him conseil to sleen a man. /570 Manslaughtre in dede is in foure maneres. That oon is by lawe; right as a Iustice dampneth him that is coupable to the deeth. But lat the Iustice be war that he do it rightfully, and that he do it nat for delyt to spille blood, but for kepinge of rightwisenesse. / Another homicyde is, that is doon for necessitee, as whan o man sleeth another in his defendaunt, and that he ne may noon otherwise escape from his owene deeth. / But certeinly, if he may escape withouten manslaughtre of his adversarie, and sleeth him, he doth sinne, and he shal bere penance as for deedly sinne. / Eek if a man, by caas or aventure, shete an arwe or caste a stoon with which he sleeth a man, he is homicyde. / Eek if a womman by necligence overlyeth hir child in hir sleping, it is homicyde and deedly sinne. /575 Eek whan man destourbeth concepcion of a child, and maketh a womman outher bareyne by drinkinge venemouse herbes, thurgh which she may nat conceyve, or sleeth a child by drinkes wilfully, or elles putteth certeine material thinges in hir secree places to slee the child; / or elles doth unkindely sinne, by which man or womman shedeth hir nature in manere or in place ther-as a child may nat be conceived; or elles, if a womman have conceyved and hurt hir-self, and sleeth the child, yet is it homicyde. / What seye we eek of wommen that mordren hir children for drede of worldly shame? Certes, an horrible homicyde. / Homicyde is eek if a man approcheth to a womman by desir of lecherye, thurgh which the child is perissed, or elles smyteth a womman witingly, thurgh which she leseth hir child. Alle thise been homicydes and horrible deedly sinnes. / Yet comen ther of Ire manye mo sinnes, as wel in word as in thoght and in dede; as he that arretteth upon god, or blameth god, of thing of which he is him-self gilty; or despyseth god and alle hise halwes, as doon thise cursede hasardours in diverse contrees. /580 This cursed sinne doon they, whan they felen in hir hertes ful wikkedly of god and of hise halwes. / Also, whan they treten unreverently the sacrement of the auter, thilke sinne is so greet, that unnethe may it been relesed, but that the mercy of god passeth alle hise werkes; it is so greet and he so benigne. / Thanne comth of Ire attry angre; whan a man is sharply amonested in his shrifte to forleten his sinne, / than wole he be angry and answeren hokerly and angrily, and deffenden or excusen his sinne by unstedefastnesse of his flesh; or elles he dide it for to holde companye with hise felawes, or elles, he seith, the fend entyced him; / or elles he dide it for his youthe, or elles his complexioun is so corageous, that he may nat forbere; or elles it is his destinee, as he seith, unto a certein age; or elles, he seith, it cometh him of gentillesse of hise auncestres; and semblable thinges. /585 Alle this manere of folk so wrappen hem in hir sinnes, that they ne wol nat delivere hem-self. For soothly, no wight that excuseth him wilfully of his sinne may nat been delivered of his sinne, til that he mekely biknoweth his sinne. / After this, thanne cometh swering, that is expres agayn the comandement of god; and this bifalleth ofte of anger and of Ire. / God seith: ‘thou shalt nat take the name of thy lord god in veyn or in ydel.’ Also oure lord Iesu Crist seith by the word of seint Mathew: ’Nolite iurare omnino: / ne wol ye nat swere in alle manere; neither by hevene, for it is goddes trone; ne by erthe, for it is the bench of his feet; ne by Ierusalem, for it is the citee of a greet king; ne by thyn heed, for thou mayst nat make an heer whyt ne blak. / But seyeth by youre word, “ye, ye," and "nay, nay"; and what 606that is more, it is of yvel,' seith Crist. /590 For Cristes sake, ne swereth nat so sinfully, in dismembringe of Crist by soule, herte, bones, and body. For certes, it semeth that ye thinke that the cursede Iewes ne dismembred nat y-nough the preciouse persone of Crist, but ye dismembre him more. / And if so be that the lawe compelle yow to swere, thanne rule yow after the lawe of god in youre swering, as seith Ieremye quarto capitulo, ’Iurabis in veritate, in iudido et in iustida: thou shalt kepe three condicions; thou shalt swere in trouthe, in doom, and in rightwisnesse.’ / This is to seyn, thou shalt swere sooth; for every lesinge is agayns Crist. For Crist is verray trouthe. And think wel this, that every greet swerere, nat compelled lawefully to swere, the wounde shal nat departe from his hous whyl he useth swich unleveful swering. / Thou shalt sweren eek in doom, whan thou art constreyned by thy domesman to witnessen the trouthe. / Eek thou shalt nat swere for envye ne for favour, ne for mede, but for rightwisnesse; for declaracioun of it to the worship of god and helping of thyne evene-cristene. /595 And therfore, every man that taketh goddes name in ydel, or falsly swereth with his mouth, or elles taketh on him the name of Crist, to be called a Cristene man, and liveth agayns Cristes livinge and his techinge, alle they taken goddes name in ydel. / Loke eek what seint Peter seith, Actuum quarto capitulo, ’Non est aliud nomen sub celo,’ &c. ‘Ther nis noon other name,’ seith seint Peter, ‘under hevene, yeven to men, in which they mowe be saved;’ that is to seyn, but the name of Iesu Crist. / Take kepe eek how that the precious name of Crist, as seith seint Paul ad Philipenses secundo, ’In nomine Iesu, &c.: that in the name of Iesu every knee of hevenely creatures, or erthely, or of helle sholden bowe’; for it is so heigh and so worshipful, that the cursede feend in helle sholde tremblen to heren it y-nempned. / Thanne semeth it, that men that sweren so horribly by his blessed name, that they despyse him more boldely than dide the cursede Iewes, or elles the devel, that trembleth whan he hereth his name. /
562. E. om. that he hath loved. 564, 565. E. spiritueel. 565. Pt. Hl. an homicide. 566. E. the (for 2nd they). 568. E. crueel. Hl. Ln. schipe. E. vsures. 570. Hl. om. him before conseil. 572. Hl. him (for in his). 576. E. Cm. venenouse; Hl. venenous. Hl. place. 577. -self] E. child. 577. is it] E. it is. 582. E. releessed. 585. E. conpleccioun. 588. Christchurch MS. Nolite — omnino; and in margin of E.; rest om. 589. Ln. throne. 592. E. (in margin) Iurabis — iusticia; Chr. (in text); rest om. 593. Hl. wonder (for wounde!). 595. E. and for declaracioun; Chr. for declaracioun; Cm. Pt. Ln. Hl. for declarynge. 597. Cm. cº; Hl. caº (i.e. capitulo); rest om. 599. E. horriblely.
§ 36. Now certes, sith that swering, but-if it be lawefully doon, is so heighly deffended, muche worse is forswering falsly, and yet nedelees. /600
§ 37. What seye we eek of hem that delyten hem in swering, and holden it a gentrie or a manly dede to swere grete othes? And what of hem that, of verray usage, ne cesse nat to swere grete othes, al be the cause nat worth a straw? Certes, this is horrible sinne. / Sweringe sodeynly with-oute avysement is eek a sinne. / But lat us go now to thilke horrible swering of adiuracioun and coniuracioun, as doon thise false enchauntours or nigromanciens in bacins ful of water, or in a bright swerd, in a cercle, or in a fyr, or in a shulder-boon of a sheep. / I can nat seye but that they doon cursedly and damnably, agayns Crist and al the feith of holy chirche. /
601. E. it (for this). 603. E. Nigromanens. 604. E. damnablely.
§ 38. What seye we of hem that bileven in divynailes, as by flight or by noyse of briddes, or of bestes, or by sort, by geomancie, by dremes, by chirkinge of dores, or crakkinge of houses, by gnawynge of rattes, and swich manere wrecchednesse? /605 Certes, al this thing is deffended by god and by al holy chirche. For which they been acursed, til they come to amendement, that on swich filthe setten hir bileve. / Charmes for woundes or maladye of men, or of bestes, if they taken any effect, it may be peraventure that god suffreth it, for folk sholden yeve the more feith and reverence to his name. /
605. Cm. Pt. dyuynalis. Hl. crakking; Ln. crakkeynge; E. Cm. Cp. Pt. crakynge. 607. E. Pt. om. may.
§ 39. Now wol I speken of lesinges, which generally is fals significacioun of word, in entente to deceyven his evene-cristene. / Som lesinge is of which ther comth noon avantage to no wight: and som lesinge turneth to the ese or profit of o man, and to disese and damage of another man. / Another lesinge is for to saven his lyf or his catel. Another lesinge comth of delyt for to lye, in which delyt they wol forge a long tale, and peynten it with alle circumstaunces, where al the ground of the tale is fals. /610 Som lesinge comth, for he wole sustene his word; and som lesinge comth of recchelesnesse, with-outen avysement; and semblable thinges. /
609. E. and (for or); Pt. either. 610. Selden, Pt. lesinge is; rest om. is. All but Selden, Pt. Ln. om. 2nd Another lesinge.
§ 40. Lat us now touche the vyce of flateringe, which ne comth nat gladly but for drede or for coveitise. / Flaterye is generally wrongful preisinge. Flatereres been the develes norices, that norissen hise children with milk of losengerie. / For sothe, Salomon seith, that ‘flaterie is wors than detraccioun.’ For som-tyme detraccion maketh an hautein man be the more humble, for he dredeth detraccion; but certes flaterye, that maketh a man to enhauncen his herte and his contenaunce. / Flatereres been the develes enchauntours; for they make a man to wene of him-self be lyk that he nis nat lyk. /615 They been lyk to Iudas that bitraysed [god; and thise flatereres bitraysen] a man to sellen him to his enemy, that is, to the devel. / Flatereres been the develes chapelleyns, that singen evere Placebo. / I rekene flaterye in the vyces of Ire; for ofte tyme, if o man be wrooth with another, thanne wol he flatere som wight to sustene him in his querele. /
615. E. the (for they). 616. All 7 Mss. om. god . . . bitraysen. E. hise. 618. E. flarie (for flaterye).
§ 41. Speke we now of swich cursinge as comth of irous herte. Malisoun generally may be seyd every maner power or harm. Swich cursinge bireveth man fro the regne of god, as seith seint Paul. / And ofte tyme swich cursinge wrongfully retorneth agayn to him that curseth, as a brid that retorneth agayn to his owene nest. /620 And over alle thing men oghten eschewe to cursen hir children, and yeven to the devel hir engendrure, as ferforth as in hem is; certes, it is greet peril and greet sinne. /
§ 42. Lat us thanne speken of chydinge and reproche, whiche been ful grete woundes in mannes herte; for they unsowen the semes of frendshipe in mannes herte. / For certes, unnethes may a man pleynly been accorded with him that hath him openly revyled and repreved in disclaundre. This is a ful grisly sinne, as Crist seith in the gospel. / And tak kepe now, that he that repreveth his neighebor, outher he repreveth him by som harm of peyne that he hath on his body, as ‘mesel,’ ‘croked harlot,’ or by som sinne that he dooth. / Now if he repreve him by harm of peyne, thanne turneth the repreve to Iesu Crist; for peyne is sent by the rightwys sonde of god, and by his suffrance, be it meselrie, or maheym, or maladye. /625 And if he repreve him uncharitably of sinne, as, ‘thou holour,’ ‘thou dronkelewe harlot,’ and so forth; thanne aperteneth that to the reioysinge of the devel, that evere hath Ioye that men doon sinne. / And certes, chydinge may nat come but out of a vileyns herte. For after the habundance of the herte speketh the mouth ful ofte. / And ye shul understonde that loke, by any wey, whan any man shal chastyse another, that he be war from chydinge or reprevinge. For trewely, but he be war, he may ful lightly quiken the fyr of angre and of wratthe, which that he sholde quenche, and per-aventure sleeth him which that he mighte chastyse with benignitee. / For as seith Salomon, ‘the amiable tonge is the tree of lyf,’ that is to seyn, of lyf espirituel: and sothly, a deslavee tonge sleeth the spirites of him that repreveth, and eek of him that is repreved. / Lo, what seith seint Augustin: ‘ther is no-thing so lyk the develes child as he that ofte chydeth.' Seint Paul seith eek: 'I, servant of god, bihove nat to chyde.' /630 And how that chydinge be a vileyns thing bitwixe alle manere folk, yet it is certes most uncovenable bitwixe a man and his wyf; for there is nevere reste. And therfore seith Salomon, ‘an hous that is uncovered and droppinge, and a chydinge wyf, been lyke.’ / A man that is in a droppinge hous in many places, though he eschewe the droppinge in o place, it droppeth on him in another place; so fareth it by a chydinge wyf. But she chyde him in o place, she wol chyde him in another. / And therfore, ‘bettre is a morsel of breed with Ioye than an hous ful of delyces, with chydinge,’ seith Salomon. / Seint Paul seith: ‘O ye wommen, be ye subgetes to youre housbondes as bihoveth in god; and ye men, loveth youre wyves.’ Ad Colossenses, tertio. /
623. E. in disclaundre; rest and desclaundered. 624. E. taak. 625. Ln. mayme; Cm. Pt. maym. 626. E. om. thou holour. 628. or] E. and. 629. E. espiritueel. Hn. deslaue; Cm. Ln. Hl. dislaue; Pt. disselaue. 630. Cm. Selden, behoue; rest byhoueth (!). 632. E. manye. 634. E. om. as . . . god. E. Colonienses; Cm. Colonienes; Hn. Pt. Colonisenses; Ln. Clonicenses; Hl. Colocenses.
§ 43. Afterward speke we of scorninge, which is a wikked sinne; and namely, whan he scorneth a man for hise gode werkes. /635 For certes, swiche scorneres faren lyk the foule tode, that may nat endure to smelle the sote savour of the vyne whanne it florissheth. / Thise scorneres been parting felawes with the devel; for they han Ioye whan the devel winneth, and sorwe whan he leseth. / They been adversaries of Iesu Crist; for they haten that he loveth, that is to seyn, salvacion of soule. /
§ 44. Speke we now of wikked conseil; for he that wikked conseil yeveth is a traytour. For he deceyveth him that trusteth in him, ut Achitofel ad Absolonem. But natheless, yet is his wikked conseil first agayn him-self. / For, as seith the wyse man, every fals livinge hath this propertee in him-self, that he that wole anoye another man, he anoyeth first him-self. /640 And men shul understonde, that man shal nat taken his conseil of fals folk, ne of angry folk, or grevous folk, ne of folk that loven specially to muchel hir owene profit, ne to muche worldly folk, namely, in conseilinge of soules. /
639. E. om. 2nd for. 640. All lyuynge (levyng, leueyng); after which Selden (alone) adds man. Selden, Ln. Hl. this; rest his. 641. E. Hn. om. ne of folk.
§ 45. Now comth the sinne of hem that sowen and maken discord amonges folk, which is a sinne that Crist hateth outrely; and no wonder is. For he deyde for to make concord. / And more shame do they to Crist, than dide they that him crucifyede; for god loveth bettre, that frendshipe be amonges folk, than he dide his owene body, the which that he yaf for unitee. Therfore been they lykned to the devel, that evere been aboute to maken discord. /
643. E. been; Hl. ben (before aboute); rest is.
§ 46. Now comth the sinne of double tonge; swiche as speken faire biforn folk, and wikkedly bihinde; or elles they maken semblant as though they speke of good entencioun, or elles in game and pley, and yet they speke of wikked entente. /
644. E. speeke (1st time); Hn. Hl. speke; Cm. spoke; Pt. speken; Ln. spake.
§ 47. Now comth biwreying of conseil, thurgh which a man is defamed; certes, unnethe may he restore the damage. /645
Now comth manace, that is an open folye; for he that ofte manaceth, he threteth more than he may perfourne ful ofte tyme. /
Now cometh ydel wordes, that is with-outen profit of him that speketh tho wordes, and eek of him that herkneth tho wordes. Or elles ydel wordes been tho that been nedelees, or with-outen entente of naturel profit. / And al-be-it that ydel wordes been som tyme venial sinne, yet sholde men douten hem; for we shul yeve rekeninge of hem bifore god. /
647. E. natureel.
Now comth Ianglinge, that may nat been withoute sinne. And, as seith Salomon, ‘it is a sinne of apert folye.’ / And therfore a philosophre seyde, whan men axed him how that men sholde plese the peple; and he answerde, ‘do many gode werkes, and spek fewe Iangles.' /650
After this comth the sinne of Iaperes, that been the develes apes; for they maken folk to laughe at hir Iaperie, as folk doon at the gaudes of an ape. Swiche Iaperes deffendeth seint Paul. / Loke how that vertuouse wordes and holy conforten hem that travaillen in the service of Crist; right so conforten the vileyns wordes and knakkes of Iaperis hem that travaillen in the service of the devel. / Thise been the sinnes that comen of the tonge, that comen of Ire and of othere sinnes mo. /
651. Hl. Pt. Ln. Suche iapes. 652. E. adds woordes (after holy).
Sequitur remedium contra peccatum Ire.
§ 48. The remedye agayns Ire is a vertu that men clepen Mansuetude, that is Debonairetee; and eek another vertu, that men callen Pacience or Suffrance. /
654. Cm. (only) that Ihon de Bonania clepith debonayretee.
§ 49. Debonairetee withdraweth and refreyneth the stiringes and the moevynges of mannes corage in his herte, in swich manere that they ne skippe nat out by angre ne by Ire. /655 Suffrance suffreth swetely alle the anoyaunces and the wronges that men doon to man outward. / Seint Ierome seith thus of debonairetee, that ‘it doth noon harm to no wight, ne seith; ne for noon harm that men doon or seyn, he ne eschaufeth nat agayns, his resoun.’ / This vertu som-tyme comth of nature; for, as seith the philosophre, ‘a man is a quik thing, by nature debonaire and tretable to goodnesse; but whan debonairetee is enformed of grace, thanne is it the more worth.’ /
§ 50. Pacience, that is another remedye agayns Ire, is a vertu that suffreth swetely every mannes goodnesse, and is nat wrooth for noon harm that is doon to him. / The philosophre seith, that ‘pacience is thilke vertu that suffreth debonairely alle the outrages of adversitee and every wikked word.' /660 This vertu maketh a man lyk to god, and maketh him goddes owene dere child, as seith Crist. This vertu disconfiteth thyn enemy. And therfore seith the wyse man, ‘if thou wolt venquisse thyn enemy, lerne to suffre.’ / And thou shalt understonde, that man suffreth foure manere of grevances in outward thinges, agayns the whiche foure he moot have foure manere of paciences. /
659. E. Ln. it is a; rest is a.
§ 51. The firste grevance is of wikkede wordes; thilke suffrede Iesu Crist with-outen grucching, ful paciently, whan the Iewes despysed and repreved him ful ofte. / Suffre thou therfore paciently; for the wyse man seith: ‘if thou stryve with a 612fool, though the fool be wrooth or though he laughe, algate thou shalt have no reste.' / That other grevance outward is to have damage of thy catel. Ther-agayns suffred Crist ful paciently, whan he was despoyled of al that he hadde in this lyf, and that nas but hise clothes. /665 The thridde grevance is a man to have harm in his body. That suffred Crist ful paciently in al his passioun. / The fourthe grevance is in outrageous labour in werkes. Wherfore I seye, that folk that maken hir servants to travaillen to grevously, or out of tyme, as on halydayes, soothly they do greet sinne. / Heer-agayns suffred Crist ful paciently, and taughte us pacience, whan he bar up-on his blissed shulder the croys, up-on which he sholde suffren despitous deeth. / Heer may men lerne to be pacient; for certes, noght only Cristen men been pacient for love of Iesu Crist, and for guerdoun of the blisful lyf that is perdurable; but certes, the olde payens, that nevere were Cristene, commendeden and useden the vertu of pacience. /
668. E. baar. Cm. Ln. cros. 669. Hl. Pt. Ln. guerdoun; E. Cm. gerdoun; Hn. gerdon. E. perdurale.
§ 52. A philosophre up-on a tyme, that wolde have beten his disciple for his grete trespas, for which he was greetly amoeved, and broghte a yerde to scourge the child; /670 and whan this child saugh the yerde, he seyde to his maister, ‘what thenke ye to do?’ ‘I wol bete thee,’ quod the maister, ‘for thy correccion.’ / ‘For sothe,’ quod the child, ‘ye oghten first correcte youre-self, that han lost al youre pacience for the gilt of a child.’ / ‘For sothe,’ quod the maister al wepinge, ‘thou seyst sooth; have thou the yerde, my dere sone, and correcte me for myn inpacience.’ / Of Pacience comth Obedience, thurgh which a man is obedient to Crist and to alle hem to whiche he oghte to been obedient in Crist. / And understond wel that obedience is perfit, whan that a man doth gladly and hastily, with good herte entierly, al that he sholde do. /675 Obedience generally, is to perfourne the doctrine of god and of his sovereyns, to whiche him oghte to ben obeisaunt in alle rightwysnesse. /
670. Hn. scourge; E. scoure with; rest scoure(!). 671. Cm. Hl. to do; E. do. Pt. Ln. what wil ye do.
Sequitur de Accidia.
§ 53. After the sinnes of Envie and of Ire, now wol I speken of the sinne of Accidie. For Envye blindeth the herte of a man, and Ire troubleth a man; and Accidie maketh him hevy, thoghtful, and wrawe. / Envye and Ire maken bitternesse in herte; which bitternesse is moder of Accidie, and binimeth him the love of alle goodnesse. Thanne is Accidie the anguissh of a trouble herte; and seint Augustin seith: ‘it is anoy of goodnesse and Ioye of harm.’ / Certes, this is a dampnable sinne; for it doth wrong to Iesu Crist, in-as-muche as it binimeth the service that men oghte doon to Crist with alle diligence, as seith Salomon. / But Accidie dooth no swich diligence; he dooth alle thing with anoy, and with wrawnesse, slaknesse, and excusacioun, and with ydelnesse and unlust; for which the book seith: ‘acursed be he that doth the service of god necligently.' /680 Thanne is Accidie enemy to everich estaat of man; for certes, the estaat of man is in three maneres. / Outher it is thestaat of innocence, as was thestaat of Adam biforn that he fil into sinne; in which estaat he was holden to wirche, as in heryinge and adouringe of god. / Another estaat is the estaat of sinful men, in which estaat men been holden to laboure in preyinge to god for amendement of hir sinnes, and that he wole graunte hem to arysen out of hir sinnes. / Another estaat is thestaat of grace, in which estaat he is holden to werkes of penitence; and certes, to alle thise thinges is Accidie enemy and contrarie. For he loveth no bisinesse at al. / Now certes, this foule sinne Accidie is eek a ful greet enemy to the lyflode of the body; for it ne hath no purveaunce agayn temporel necessitee; for it forsleweth and forsluggeth, and destroyeth alle goodes tem-poreles by reccheleesnesse. /685
677. Selden, Pt. Ln. sinnes; rest synne. E. om. a after herte of. E. wrawful; Pt. wrowe; rest wrawe. 678. E. Hl. om. a. E. troubled. 683. E. om. the. 685. sinne] E. swyn. E. temporeel (for temporel).
§ 54. The fourthe thinge is, that Accidie is lyk to hem that been in the peyne of helle, by-cause of hir slouthe and of hir hevinesse; for they that been dampned been so bounde, that they ne may neither wel do ne wel thinke. / Of Accidie comth first, that a man is anoyed and encombred for to doon any goodnesse, and maketh that god hath abhominacion of swich Accidie, as seith seint Iohan. /
687. E. om. as . . . Iohan.
§ 55. Now comth Slouthe, that wol nat suffre noon hardnesse ne no penaunce. For soothly, Slouthe is so tendre, and so delicat, as seith Salomon, that he wol nat suffre noon hardnesse ne penaunce, and therfore he shendeth al that he dooth. / Agayns 614this roten-herted sinne of Accidie and Slouthe sholde men exercise hem-self to doon gode werkes, and manly and vertuously cacchen corage wel to doon; thinkinge that oure lord Iesu Crist quyteth every good dede, be it never so lyte. / Usage of labour is a greet thing; for it maketh, as seith seint Bernard, the laborer to have stronge armes and harde sinwes; and Slouthe maketh hem feble and tendre. /690 Thanne comth drede to biginne to werke any gode werkes; for certes, he that is enclyned to sinne, him thinketh it is so greet an empryse for to undertake to doon werkes of goodnesse, / and casteth in his herte that the circumstaunces of goodnesse been so grevouse and so chargeaunt for to suffre, that he dar nat undertake to do werkes of goodnesse, as seith seint Gregorie. /
688. E. delicaat. 691. E. anye.
§ 56. Now comth wanhope, that is despeir of the mercy of god, that comth somtyme of to muche outrageous sorwe, and somtyme of to muche drede; imagininge that he hath doon so muche sinne, that it wol nat availlen him, though he wolde repenten him and forsake sinne: / thurgh which despeir or drede he abaundoneth al his herte to every maner sinne, as seith seint Augustin. / Which dampnable sinne, if that it continue un-to his ende, it is cleped sinning in the holy gost. /695 This horrible sinne is so perilous, that he that is despeired, ther nis no felonye ne no sinne that he douteth for to do; as shewed wel by Iudas. / Certes, aboven alle sinnes thanne is this sinne most displesant to Crist, and most adversarie. / Soothly, he that despeireth him is lyk the coward champioun recreant, that seith creant withoute nede. Allas! allas! nedeles is he recreant and nedeles despeired. / Certes, the mercy of god is evere redy to every penitent, and is aboven alle hise werkes. / Allas! can nat a man bithinke him on the gospel of seint Luk, 15., where-as Crist seith that ‘as wel shal ther be Ioye in hevene upon a sinful man that doth penitence, as up-on nynety and nyne rightful men that neden no penitence?' /700 Loke forther, in the same gospel, the Ioye and the feste of the gode man that hadde lost his sone, whan his sone with repentaunce was retourned to his fader. / Can they nat remembren hem eek, that, as seith seint Luk xxiiiº capitulo, how that the theef that was hanged bisyde Iesu Crist, seyde: 'Lord, remembre of me, whan thou comest in-to thy regne?' / 'For sothe,’ seyde Crist, ‘I seye to thee, to-day shaltow been with me in Paradys.’ / Certes, ther is noon so horrible sinne of man, that it ne may, in his lyf, be destroyed by penitence, thurgh vertu of the passion and of the deeth of Crist. / Allas! what nedeth man thanne to been despeired, sith that his mercy so redy is and large? Axe and have. /705 Thanne cometh Sompnolence, that is, sluggy slombringe, which maketh a man be hevy and dul, in body and in soule; and this sinne comth of Slouthe. / And certes, the tyme that, by wey of resoun, men sholde nat slepe, that is by the morwe; but-if ther were cause resonable. / For soothly, the morwe-tyde is most covenable, a man to seye his preyeres, and for to thinken on god, and for to honoure god, and to yeven almesse to the povre, that first cometh in the name of Crist. / Lo! what seith Salomon: ‘who-so wolde by the morwe awaken and seke me, he shal finde.’ / Thanne cometh Necligence, or recchelesnesse, that rekketh of no-thing. And how that ignoraunce be moder of alle harm, certes, Necligence is the norice. /710 Necligence ne doth no fors, whan he shal doon a thing, whether he do it weel or baddely. /
696. E. sheweth. 698. E. om. that seith . . . recreant. Hl. recreaunt (for creant). 700. E. a man nat; Pt. a man not. Hl. as vp-on; rest than vp-on. Hl. Selden, nynety and nyne; rest 90 and 19(!). 702. All but Seld. Ln. om. capitulo. Seld. Pt. Ln. on me. 706. E. Seld. sloggy; Ln. slogge. 707. E. om. the morwe. 711. E. wheither.
§ 57. Of the remedie of thise two sinnes, as seith the wyse man, that ‘he that dredeth god, he spareth nat to doon that him oghte doon.’ / And he that loveth god, he wol doon diligence to plese god by his werkes, and abaundone him-self, with al his might, wel for to doon. / Thanne comth ydelnesse, that is the yate of alle harmes. An ydel man is lyk to a place that hath no walles; the develes may entre on every syde and sheten at him at discovert, by temptacion on every syde. / This ydelnesse is the thurrok of alle wikked and vileyns thoghtes, and of alle Iangles, trufles, and of alle ordure. /715 Certes, the hevene is yeven to hem that wol labouren, and nat to ydel folk. Eek David seith: that ‘they ne been nat in the labour of men, ne they shul nat been whipped with men,’ that is to seyn, in purgatorie. / Certes, thanne semeth it, they shul be tormented with the devel in helle, but-if they doon penitence. /
715. Hl. tryfles; Seld. triflis.
§ 58. Thanne comth the sinne that men clepen Tarditas, as whan a man is to latrede or taryinge, er he wole turne to god; and certes, that is a greet folye. He is lyk to him that falleth in the dich, and wol nat aryse. / And this vyce comth of a fals hope, that he thinketh that he shal live longe; but that hope faileth ful ofte. /
718. Cm. Pt. Ln. Hl. so (for to). E. Cm. laterede; Hl. Seld. latrede; Pt. lattred; Ln. latred.
§ 59. Thanne comth Lachesse; that is he, that whan he biginneth any good werk, anon he shal forleten it and stinten; as doon they that han any wight to governe, and ne taken of him na-more kepe, anon as they finden any contrarie or any anoy. /720 Thise been the newe shepherdes, that leten hir sheep witingly go renne to the wolf that is in the breres, or do no fors of hir owene governaunce. / Of this comth poverte and destruccioun, bothe of spirituel and temporel thinges. Thanne comth a manere coldnesse, that freseth al the herte of man. / Thanne comth undevocioun, thurgh which a man is so blent, as seith Seint Bernard, and hath swiche langour in soule, that he may neither rede ne singe in holy chirche, ne here ne thinke of no devocioun, ne travaille with hise handes in no good werk, that it nis him unsavory and al apalled. / Thanne wexeth he slow and slombry, and sone wol be wrooth, and sone is enclyned to hate and to envye. / Thanne comth the sinne of worldly sorwe, swich as is cleped tristicia, that sleeth man, as seint Paul seith. /725 For certes, swich sorwe werketh to the deeth of the soule and of the body also; for ther-of comth, that a man is anoyed of his owene lyf. / Wherfore swich sorwe shorteth ful ofte the lyf of a man, er that his tyme be come by wey of kinde. /
722. E. spiritueel; temporeel. E. Pt. of a man. 723. E. om. so. blent] Ln. blonte; Hl. blunt. 724. E. slough (for slow). 725. Cm. swich as; Hl. such as; E. which as.
Remedium contra peccatum Accidie.
§ 60. Agayns this horrible sinne of Accidie, and the branches of the same, ther is a vertu that is called Fortitudo or Strengthe; that is, an affeccioun thurgh which a man despyseth anoyous thinges. / This vertu is so mighty and so vigorous, that it dar withstonde mightily and wysely kepen him-self fro perils that been wikked, and wrastle agayn the assautes of the devel. / For it enhaunceth and enforceth the soule, right as Accidie abateth it and maketh it feble. For this Fortitudo may endure by long suffraunce the travailles that been covenable. /730
727. E. Cm. of man; Seld. of men; rest of a man. 728. E. anoyouse; Cm. noyouse; rest noyous. 729. E. Cm. vigerous. 730. E. fieble. Hl. conuenables.
§ 61. This vertu hath manye speces; and the firste is cleped Magnanimitee, that is to seyn, greet corage. For certes, ther bihoveth greet corage agains Accidie, lest that it ne swolwe the soule by the sinne of sorwe, or destroye it by wanhope. / This vertu maketh folk to undertake harde thinges and grevouse thinges, by hir owene wil, wysely and resonably. / And for as muchel as the devel fighteth agayns a man more by queyntise and by sleighte than by strengthe, therfore men shal withstonden him by wit and by resoun and by discrecioun. / Thanne arn ther the vertues of feith, and hope in god and in hise seintes, to acheve and acomplice the gode werkes in the whiche he purposeth fermely to continue. / Thanne comth seuretee or sikernesse; and that is, whan a man ne douteth no travaille in tyme cominge of the gode werkes that a man hath bigonne. /735 Thanne comth Magnificence, that is to seyn, whan a man dooth and perfourneth grete werkes of goodnesse that he hath bigonne; and that is the ende why that men sholde do gode werkes; for in the acomplissinge of grete goode werkes lyth the grete guerdoun. / Thanne is ther Constaunce, that is, stablenesse of corage; and this sholde been in herte by stedefast feith, and in mouth, and in beringe, and in chere and in dede. / Eke ther been mo speciale remedies agains Accidie, in diverse werkes, and in consideracioun of the peynes of helle, and of the Ioyes of hevene, and in trust of the grace of the holy goost, that wole yeve him might to perfourne his gode entente. /
731. E. Magnificence (by error; with Of Magnanimitee in the margin). 732. E. wesely (for wysely). 736. E. om. that he hath bigonne. E. gerdoun. 737. E. chiere.
Sequitur de Auaricia.
§ 62. After Accidie wol I speke of Avarice and of Coveitise, of which sinne seith seint Paule, that ‘the rote of alle harmes is Coveitise’: Ad Timotheum, sexto capitulo. / For soothly, whan the herte of a man is confounded in it-self and troubled, and that the soule hath lost the confort of god, thanne seketh he an ydel solas of worldly thinges. /740
739. Pt. Capitulo; rest om.
§ 63. Avarice, after the descripcion of seint Augustin, is likerousnesse in herte to have erthely thinges. / Som other folk seyn, that Avarice is, for to purchacen manye erthely thinges, and nothing yeve to hem that han nede. / And understond, that Avarice ne stant nat only in lond ne catel, but somtyme in science 618and in glorie, and in every manere of outrageous thing is Avarice and Coveitise. / And the difference bitwixe Avarice and Coveitise is this. Coveitise is for to coveite swiche thinges as thou hast nat; and Avarice is for to withholde and kepe swiche thinges as thou hast, with-oute rightful nede. / Soothly, this Avarice is a sinne that is ful dampnable; for al holy writ curseth it, and speketh agayns that vyce; for it dooth wrong to Iesu Crist. /745 For it bireveth him the love that men to him owen, and turneth it bakward agayns alle resoun; / and maketh that the avaricious man hath more hope in his catel than in Iesu Crist, and dooth more observance in kepinge of his tresor than he dooth to service of Iesu Crist. / And therfore seith seint Paul ad Ephesios, quinto, that ‘an avaricious man is in the thraldom of ydolatrie.’ /
743. E. vnderstoond. 748. E. Hl. om. in after is; Pt. hath more hope in his thraldome; Ln. is thral. No MS. has the precise reading given; but it is clear that in has been dropped.
§ 64. What difference is bitwixe an ydolastre and an avaricious man, but that an ydolastre, per aventure, ne hath but o mawmet or two, and the avaricious man hath manye? For certes, every florin in his cofre is his mawmet. / And certes, the sinne of Mawmetrye is the firste thing that God deffended in the ten comaundments, as bereth witnesse Exodi, capitulo xxº: /750 'Thou shall have no false goddes bifore me, ne thou shall make to thee no grave thing.’ Thus is an avaricious man, that loveth his tresor biforn god, an ydolastre, / thurgh this cursed sinne of Avarice. Of Coveitise comen thise harde lordshipes, thurgh whiche men been distreyned by tailages, custumes, and cariages, more than hir duetee or resoun is. And eek they taken of hir bonde-men amerciments, whiche mighten more resonably ben cleped extorcions than amerciments. / Of whiche amerciments and raunsoninge of bondemen, somme lordes stywardes seyn, that it is rightful; for-as-muche as a cherl hath no temporel thing that it ne is his lordes, as they seyn. / But certes, thise lordshipes doon wrong, that bireven hir bonde-folk thinges that they nevere yave hem: Augustinus de Civitate, libro nono. / Sooth is, that the condicioun of thraldom and the firste cause of thraldom is for sinne; Genesis, quinto. /755
752. E. Amercimentz (twice); whice (sic). 753. E. temporeel.
§ 65. Thus may ye seen that the gilt disserveth thraldom, but nat nature. / Wherfore thise lordes ne sholde nat muche glorifyen hem in hir lordshipes, sith that by naturel condicion they been nat lordes of thralles; but for that thraldom comth first by the desert of sinne. / And forther-over, ther-as the lawe seith, that temporel godes of bonde-folk been the godes of hir lordshipes, ye, that is for to understonde, the godes of the emperour, to deffenden hem in hir right, but nat for to robben hem ne reven hem. / And therfore seith Seneca: ‘thy prudence sholde live benignely with thy thralles.’ / Thilke that thou clepest thy thralles been goddes peple; for humble folk been Cristes freendes; they been contubernial with the lord. /760
757. E. natureel; om. for. 758. E. temporeel.
§ 66. Think eek, that of swich seed as cherles springeth, of swich seed springen lordes. As wel may the cherl be saved as the lord. / The same deeth that taketh the cherl, swich deeth taketh the lord. Wherfore I rede, do right so with thy cherl, as thou woldest that thy lord dide with thee, if thou were in his plyt. / Every sinful man is a cherl to sinne. I rede thee, certes, that thou, lord, werke in swiche wyse with thy cherles, that they rather love thee than drede. / I woot wel ther is degree above degree, as reson is; and skile it is, that men do hir devoir ther-as it is due; but certes, extorcions and despit of youre underlinges is dampnable. /
§ 67. And forther-over understand wel, that thise conquerours or tiraunts maken ful ofte thralles of hem, that been born of as royal blood as been they that hem conqueren. /765 This name of thraldom was nevere erst couth, til that Noe seyde, that his sone Canaan sholde be thral to hise bretheren for his sinne. / What seye we thanne of hem that pilen and doon extorcions to holy chirche? Certes, the swerd, that men yeven first to a knight whan he is newe dubbed, signifyeth that he sholde deffenden holy chirche, and nat robben it ne pilen it; and who so dooth, is traitour to Crist. / And, as seith seint Augustin, ‘they been the develes wolves, that stranglen the sheep of Iesu Crist’; and doon worse than wolves. / For soothly, whan the wolf hath ful his wombe, he stinteth to strangle sheep. But soothly, the pilours and destroyours of goddes holy chirche ne do nat so; for they ne stinte nevere to pile. / Now, as I have seyd, sith so is that sinne was first cause of thraldom, thanne is it thus; that thilke tyme that al this world was in sinne, thanne was al this world in thraldom and subieccioun. /770 But certes, sith the tyme of grace cam, god ordeyned that som folk sholde be more heigh 620in estaat and in degree, and som folk more lowe, and that everich sholde be served in his estaat and in his degree. / And therfore, in somme contrees ther they byen thralles, whan they han turned hem to the feith, they maken hir thralles free out of thraldom. And therfore, certes, the lord oweth to his man that the man oweth to his lord. / The Pope calleth him-self servant of the servaunts of god; but for-as-muche as the estaat of holy chirche ne mighte nat han be, ne the commune profit mighte nat han be kept, ne pees and reste in erthe, but-if god hadde ordeyned that som men hadde hyer degree and som men lower: / therfore was sovereyntee ordeyned to kepe and mayntene and deffenden hir underlinges or hir subgets in resoun, as ferforth as it lyth in hir power; and nat to destroyen hem ne confounde. / Wherfore I seye, that thilke lordes that been lyk wolves, that devouren the possessiouns or the catel of povre folk wrongfully, with-outen mercy or mesure, /775 they shul receyven, by the same mesure that they han mesured to povre folk, the mercy of Iesu Crist, but-if it be amended. / Now comth deceite bitwixe marchant and marchant. And thow shalt understonde, that marchandyse is in two maneres; that oon is bodily, and that other is goostly. That oon is honeste and leveful, and that other is deshoneste and unleveful. / Of thilke bodily marchandyse, that is leveful and honeste, is this; that, there-as god hath ordeyned that a regne or a contree is suffisaunt to him-self, thanne is it honeste and leveful, that of habundaunce of this contree, that men helpe another contree that is more nedy. / And therfore, ther mote been marchants to bringen fro that o contree to that other hire marchandyses. / That other marchandise, that men haunten with fraude and trecherie and deceite, with lesinges and false othes, is cursed and dampnable. /780 Espirituel marchandyse is proprely Symonye, that is, ententif desyr to byen thing espirituel, that is, thing that aperteneth to the seintuarie of god and to cure of the soule. / This desyr, if so be that a man do his diligence to parfournen it, al-be-it that his desyr ne take noon effect, yet is it to him a deedly sinne; and if he be ordred, he is irreguler. / Certes, Symonye is cleped of Symon Magus, that wolde han boght, for temporel catel, the yifte that god hadde yeven, by the holy goost, to seint Peter and to the apostles. / And therfore understond, that bothe he that selleth and he that byeth thinges espirituels, been cleped Symonials; be it by catel, be it by procuringe, or by fleshly preyere of hise freendes, fleshly freendes, or espirituel freendes. / Fleshly, in two maneres; as by kinrede or othere freendes. Soothly, if they praye for him that is nat worthy and able, it is Symonye if he take the benefice; and if he be worthy and able, ther nis noon. /785 That other manere is, whan a man or womman preyen for folk to avauncen hem, only for wikked fleshly affeccioun that they have un-to the persone; and that is foul Symonye. / But certes, in service, for which men yeven thinges espirituels un-to hir servants, it moot been understonde that the service moot been honeste, and elles nat; and eek that it be with-outen bargayninge, and that the persone be able. / For, as seith Seint Damasie, ‘alle the sinnes of the world, at regard of this sinne, am as thing of noght’; for it is the gretteste sinne that may be, after the sinne of Lucifer and Antecrist. / For, by this sinne, god forleseth the chirche, and the soule that he boghte with his precious blood, by hem that yeven chirches to hem that been nat digne. / For they putten in theves, that stelen the soules of Iesu Christ and destroyen his patrimoine. /790 By swiche undigne preestes and curates han lewed men the lasse reverence of the sacraments of holy chirche; and swiche yeveres of chirches putten out the children of Crist, and putten in-to the chirche the develes owene sone. / They sellen the soules that lambes sholde kepen to the wolf that strangleth hem. And therfore shul they nevere han part of the pasture of lambes, that is, the blisse of hevene. / Now comth hasardrye with hise apurtenaunces, as tables and rafles; of which comth deceite, false othes, chydinges, and alle ravines, blaspheminge and reneyinge of god, and hate of hise neighebores, wast of godes, misspendinge of tyme, and somtyme manslaughtre. / Certes, hasardours ne mowe nat been with-outen greet sinne whyles they haunte that craft. / Of avarice comen eek lesinges, thefte, fals witnesse, and false othes. And ye shul understonde that thise been grete sinnes, and expres agayn the comaundements of god, as I have seyd. /795 Fals witnesse is in word and eek in dede. In word, as for to bireve thy neighebores goode name by thy fals witnessing, or bireven him his catel or his heritage by thy fals witnessing; whan thou, for ire or for mede, or for envye, berest fals witnesse, or accusest him or excusest him by thy fals witnesse, or elles excusest thy-self falsly. / Ware yow, questemongeres and notaries! Certes, for fals witnessing was Susanna in ful gret sorwe and peyne, and many another mo. / The sinne of thefte is eek expres agayns goddes heste, and that in two maneres, corporel and espirituel. / Corporel, as for to take thy neighebores catel agayn his wil, be it by force or by sleighte, be it by met or by mesure. / By steling eek of false enditements upon him, and in borwinge of thy neighebores catel, in entente nevere to payen it agayn, and semblable thinges. /800 Espirituel thefte is Sacrilege, that is to seyn, hurtinge of holy thinges, or of thinges sacred to Crist, in two maneres; by reson of the holy place, as chirches or chirche-hawes, / for which every vileyns sinne that men doon in swiche places may be cleped sacrilege, or every violence in the semblable places. Also, they that withdrawen falsly the rightes that longen to holy chirche. / And pleynly and generally, sacrilege is to reven holy thing fro holy place, or unholy thing out of holy place, or holy thing out of unholy place. /
765. E. vnderstoond; tirauntz. 767. to (1)] E. in. 771. E. lough; om. and in his degree. 774. E. subgetz. 777. Ed. 1550, two; Mss. manye. 781. E. Espiritueel (twice). 782. E. irreguleer. 783. E. temporeel. 784. E. vnderstoond; beyeth; espiritueel. 791. E. sacramentz. 793. Hl. raueynes; Pt. ravanys; Cm. rauynesse; Ln. rauynges. 794. E. Cm. om. whyles . . . craft. 798. E. heeste; om. that; corporeel. Hl. Pt. Ln. and; rest or. E. espiritueel. 799. Hl. Corporel; rest om. 801. E. Espiritueel.
Relevacio contra peccatum Avaricie.
§ 68. Now shul ye understonde, that the relevinge of Avarice is misericorde, and pitee largely taken. And men mighten axe, why that misericorde and pitee is relevinge of Avarice? / Certes, the avaricious man sheweth no pitee ne misericorde to the nedeful man; for he delyteth him in the kepinge of his tresor, and nat in the rescowinge ne relevinge of his evene-cristene. And therfore fore speke I first of misericorde. /805 Thanne is misericorde, as seith the philosophre, a vertu, by which the corage of man is stired by the misese of him that is misesed. / Up-on which misericorde folweth pitee, in parfourninge of charitable werkes of misericorde. / And certes, thise thinges moeven a man to misericorde of Iesu Crist, that he yaf him-self for oure gilt, and suffred deeth for misericorde, and forgaf us oure originale sinnes; / and therby relessed us fro the peynes of helle, and amenused the peynes of purgatorie by penitence, and yeveth grace wel to do, and atte laste the blisse of hevene. / The speces of misericorde been, as for to lene and for to yeve and to foryeven and relesse, and for to han pitee in herte, and compassioun of the meschief of his evene-cristene, and eek to chastyse there as nede is. /810 Another manere of remedie agayns Avarice is resonable largesse; but soothly, here bihoveth the consideracioun of the grace of Iesu Crist, and of hise temporel goodes, and eek of the godes perdurables that Crist yaf to us; / and to han remembrance of the deeth that he shal receyve, he noot whanne, where, ne how; and eek that he shal forgon al that he hath, save only that he hath despended in gode werkes. /
Title. Hl. Remedium (for Releuacio). 806. Cm. Ln. sterid. 811. E. temporeel.
§ 69. But for-as-muche as som folk been unmesurable, men oghten eschue fool-largesse, that men clepen wast. / Certes, he that is fool-large ne yeveth nat his catel, but he leseth his catel. Soothly, what thing that he yeveth for veyne glorie, as to minstrals and to folk, for to beren his renoun in the world, he hath sinne ther-of and noon almesse. / Certes, he leseth foule his good, that ne seketh with the yifte of his good no-thing but sinne. /815 He is lyk to an hors that seketh rather to drinken drovy or trouble water than for to drinken water of the clere welle. / And for-as-muchel as they yeven ther as they sholde nat yeven, to hem aperteneth thilke malisoun that Crist shal yeven at the day of dome to hem that shullen been dampned. /
813. E. oughten. 816. Seld. droupy (for drovy).
Sequitur de Gula.
§ 70. After Avarice comth Glotonye, which is expres eek agayn the comandement of god. Glotonye is unmesurable appetyt to ete or to drinke, or elles to doon y-nogh to the unmesurable appetyt and desordeynce coveityse to eten or to drinke. / This sinne corrumped al this world, as is wel shewed in the sinne of Adam and of Eve. Loke eek, what seith seint Paul of Glotonye. / ‘Manye,’ seith seint Paul, ‘goon, of whiche I have ofte seyd to yow, and now I seye it wepinge, that they been the enemys of the croys of Crist; of whiche the ende is deeth, and of whiche hir wombe is hir god, and hir glorie in confusioun of hem that so saveren erthely thinges.' /820 He that is usaunt to this sinne of Glotonye, he ne may no sinne withstonde. He moot been in servage of alle vyces, for it is the develes hord ther he hydeth him and resteth. / This sinne hath manye speces. The firste is dronkenesse, that is the horrible sepulture of mannes resoun; and therfore, whan a man is dronken, he hath lost his resoun; and this is deedly sinne. / But soothly, whan that a man is nat wont to strong drinke, and peraventure ne knoweth nat the strengthe of the drinke, or hath feblesse in his heed, or hath travailed, thurgh which he drinketh the more, al be he sodeynly caught with drinke, it is no deedly sinne, but venial. / The seconde spece of Glotonye is, that the spirit of a man wexeth al trouble; for dronkenesse bireveth him the discrecioun of his wit. / The thridde spece of Glotonye is, whan a man devoureth his mete, and hath no rightful manere of etinge. /825 The fourthe is whan, thurgh the grete habundaunce of his mete, the humours in his body been destempred. / The fifthe is, foryetelnesse by to muchel drinkinge; for which somtyme a man foryeteth er the morwe what he dide at even or on the night biforn. /
820. Pt. Ln. thei; rest om. Hl. Pt. Ln. saueren; rest deuouren. 821. E. hoord. 823. Cm. woned. 827. Cm. forȝetefulnesse.
§ 71. In other manere been distinct the speces of Glotonye, after seint Gregorie. The firste is, for to ete biforn tyme to ete. The seconde is, whan a man get him to delicat mete or drinke. / The thridde is, whan men taken to muche over mesure. The fourthe is curiositee, with greet entente to maken and apparaillen his mete. The fifthe is, for to eten to gredily. / Thise been the fyve fingres of the develes hand, by whiche he draweth folk to sinne. /830
828. E. delicaat.
Remedium contra peccatum Gule.
§ 72. Agayns Glotonye is the remedie Abstinence, as seith Galien; but that holde I nat meritorie, if he do it only for the hele of his body. Seint Augustin wole, that Abstinence be doon for vertu and with pacience. / Abstinence, he seith, is litel worth, but if a man have good wil ther-to, and but it be enforced by pacience and by charitee, and that men doon it for godes sake, and in hope to have the blisse of hevene. /
§ 73. The felawes of Abstinence been Attemperaunce, that holdeth the mene in alle thinges: eek Shame, that eschueth alle deshonestee: Suffisance, that seketh no riche metes ne drinkes, ne dooth no fors of to outrageous apparailinge of mete. / Mesure also, that restreyneth by resoun the deslavee appetyt of etinge: 625Sobrenesse also, that restreyneth the outrage of drinke: / Sparinge also, that restreyneth the delicat ese to sitte longe at his mete and softely; wherfore som folk stonden of hir owene wil, to eten at the lasse leyser. /835
835. E. delicaat.
Sequitur de Luxuria.
§ 74. After Glotonye, thanne comth Lecherie; for thise two sinnes been so ny cosins, that ofte tyme they wol nat departe. / God woot, this sinne is ful displesaunt thing to god; for he seyde himself, ‘do no lecherie.’ And therfore he putte grete peynes agayns this sinne in the olde lawe. / If womman thral were taken in this sinne, she sholde be beten with staves to the deeth. And if she were a gentil womman, she sholde be slayn with stones. And if she were a bisshoppes doghter, she sholde been brent, by goddes comandement. / Forther over, by the sinne of Lecherie, god dreynte al the world at the diluge. And after that, he brente fyve citees with thonder-leyt, and sank hem in-to helle. /
838. Cm. stonys; Ln. stones; Hl. stoones (for staues). 839. Pt. Ln. diluve; Hl. diluue (for diluge). E. thonder-leyt; Hl. -layt; rest -light.
§ 75. Now lat us speke thanne of thilke stinkinge sinne of Lecherie that men clepe Avoutrie of wedded folk, that is to seyn, if that oon of hem be wedded, or elles bothe. /840 Seint Iohn seith, that avoutiers shullen been in helle in a stank brenninge of fyr and of brimston; in fyr, for the lecherie; in brimston, for the stink of hir ordure. / Certes, the brekinge of this sacrement is an horrible thing; it was maked of god him-self in paradys, and confermed by Iesu Crist, as witnesseth seint Mathew in the gospel: ‘A man shal lete fader and moder, and taken him to his wyf, and they shullen be two in o flesh.’ / This sacrement bitokneth the knittinge togidre of Crist and of holy chirche. / And nat only that god forbad avoutrie in dede, but eek he comanded that thou sholdest nat coveite thy neighebores wyf. / In this heeste, seith seint Augustin, is forboden alle manere coveitise to doon lecherie. Lo what seith seint Mathew in the gospel: that 'who-so seeth a womman to coveitise of his lust, he hath doon lecherie with hir in his herte.' /845 Here may ye seen that nat only the dede of this sinne is forboden, but eek the desyr to doon that sinne. / This cursed sinne anoyeth grevousliche 626hem that it haunten. And first, to hir soule; for he oblygeth it to sinne and to peyne of deeth that is perdurable. / Un-to the body anoyeth it grevously also, for it dreyeth him, and wasteth, and shent him, and of his blood he maketh sacrifyce to the feend of helle; it wasteth his catel and his substaunce. / And certes, if it be a foul thing, a man to waste his catel on wommen, yet is it a fouler thing whan that, for swich ordure, wommen dispenden up-on men hir catel and substaunce. / This sinne, as seith the prophete, bireveth man and womman hir gode fame, and al hir honour; and it is ful pleasaunt to the devel; for ther-by winneth he the moste partie of this world. /850 And right as a marchant delyteth him most in chaffare that he hath most avantage of, right so delyteth the feend in this ordure. /
841. Pt. in fuyre for lechery in bremstone; Hl. In fuyr for the leccherie in brimston; Ln. for licherye in brimstone (om. in fyr); E. Cm. omit. 848. Pt. Ln. drieth.
§ 76. This is that other hand of the devel, with fyve fingres, to cacche the peple to his vileinye. / The firste finger is the fool lookinge of the fool womman and of the fool man, that sleeth, right as the basilicok sleeth folk by the venim of his sighte; for the coveitise of eyen folweth the coveitise of the herte. / The seconde finger is the vileyns touchinge in wikkede manere; and ther-fore seith Salomon, that who-so toucheth and handleth a womman, he fareth lyk him that handleth the scorpioun that stingeth and sodeynly sleeth thurgh his enveniminge; as who-so toucheth warm pich, it shent hise fingres. / The thridde, is foule wordes, that fareth lyk fyr, that right anon brenneth the herte. /855 The fourthe finger is the kissinge; and trewely he were a greet fool that wolde kisse the mouth of a brenninge ovene or of a fourneys. / And more fooles been they that kissen in vileinye; for that mouth is the mouth of helle: and namely, thise olde dotardes holours, yet wol they kisse, though they may nat do, and smatre hem. / Certes, they been lyk to houndes; for an hound, whan he comth by the roser or by othere [busshes], though he may nat pisse, yet wole he heve up his leg and make a contenaunce to pisse. / And for that many man weneth that he may nat sinne, for no likerousnesse that he doth with his wyf; certes, that opinion is fals. God woot, a man may sleen him-self with his owene knyf, and make him-selven dronken of his owene tonne. / Certes, be it wyf, be it child, or any worldly thing that he loveth biforn god, it is his maumet, and he is an ydolastre. /860 Man sholde loven his wyf by discrecioun, paciently and atemprely; and thanne is she as though it were his suster. / The fifthe finger of the develes hand is the stinkinge dede of Lecherie. / Certes, the fyve fingres of Glotonie the feend put in the wombe of a man, and with hise fyve fyngres of Lecherie he gripeth him by the reynes, for to throwen him in-to the fourneys of helle; / ther-as they shul han the fyr and the wormes that evere shul lasten, and wepinge and wailinge, sharp hunger and thurst, and grimnesse of develes that shullen al to-trede hem, with-outen respit and withouten ende. / Of Lecherie, as I seyde, sourden diverse speces; as fornicacioun, that is bitwixe man and womman that been nat maried; and this is deedly sinne and agayns nature. /865 Al that is enemy and destruccioun to nature is agayns nature. / Parfay, the resoun of a man telleth eek him wel that it is deedly sinne, for-as-muche as god forbad Lecherie. And seint Paul yeveth hem the regne, that nis dewe to no wight but to hem that doon deedly sinne. / Another sinne of Lecherie is to bireve a mayden of hir maydenhede; for he that so dooth, certes, he casteth a mayden out of the hyeste degree that is in this present lyf, / and bireveth hir thilke precious fruit that the book clepeth ‘the hundred fruit.’ I ne can seye it noon other weyes in English, but in Latin it highte Centesimus fructus. / Certes, he that so dooth is cause of manye damages and vileinyes, mo than any man can rekene; right as he som-tyme is cause of alle damages that bestes don in the feeld, that breketh the hegge or the closure; thurgh which he destroyeth that may nat been restored. /870 For certes, na-more may maydenhede be restored than an arm that is smiten fro the body may retourne agayn to wexe. / She may have mercy, this woot I wel, if she do penitence; but nevere shal it be that she nas corrupt. / And al-be-it so that I have spoken somwhat of Avoutrie, it is good to shewen mo perils that longen to Avoutrie, for to eschue that foule sinne. / Avoutrie in Latin is for to seyn, approchinge of other mannes bed, thurgh which tho that whylom weren o flessh abaundone hir bodyes to othere persones. / Of this sinne, as seith the wyse man, folwen manye harmes. First, brekinge of feith; and certes, in feith is the keye of Cristendom. /875 And whan that feith is broken and lorn, soothly Cristendom stant veyn and with-outen fruit. / This sinne is eek a thefte; for thefte generally is for to reve a wight his thing agayns his wille. / Certes, this is the fouleste thefte that may be, whan a womman steleth hir body from hir housbonde and yeveth it to hire holour to defoulen hir; and steleth hir soule fro Crist, and yeveth it to the devel. / This is a fouler thefte, than for to breke a chirche and stele the chalice; for thise Avoutiers breken the temple of god spiritually, and stelen the vessel of grace, that is, the body and the soule, for which Crist shal destroyen hem, as seith Seint Paul. / Soothly of this thefte douted gretly Joseph, whan that his lordes wyf preyed him of vileinye, whan he seyde, ‘lo, my lady, how my lord hath take to me under my warde al that he hath in this world; ne no-thing of hise thinges is out of my power, but only ye that been his wyf. /880 And how sholde I thanne do this wikkednesse, and sinne so horribly agayns god, and agayns my lord? God it forbede.’ Allas! al to litel is swich trouthe now y-founde! / The thridde harm is the filthe thurgh which they breken the comandement of god, and defoulen the auctour of matrimoine, that is Crist. / For certes, in-so-muche as the sacrement of mariage is so noble and so digne, so muche is it gretter sinne for to breken it; for god made mariage in paradys, in the estaat of Innocence, to multiplye man-kinde to the service of god. / And therfore is the brekinge ther-of more grevous. Of which brekinge comen false heires ofte tyme, that wrongfully occupyen folkes heritages. And therfore wol Crist putte hem out of the regne of hevene, that is heritage to gode folk. / Of this brekinge comth eek ofte tyme, that folk unwar wedden or sinnen with hir owene kinrede; and namely thilke harlottes that haunten bordels of thise fool wommen, that mowe be lykned to a commune gonge, where-as men purgen hir ordure. /885 What seye we eek of putours that liven by the horrible sinne of putrie, and constreyne wommen to yelden to hem a certeyn rente of hir bodily puterie, ye, somtyme of his owene wyf or his child; as doon this baudes? Certes, thise been cursede sinnes. / Understond eek, that avoutrie is set gladly in the ten comandements bitwixe thefte and manslaughtre; for it is the gretteste thefte that may be; for it is thefte of body and of soule. / And it is lyk to homicyde; for it kerveth a-two and breketh a-two hem that first were maked o flesh, and therfore, by the olde lawe of god, they sholde be slayn. / But nathelees, by the lawe of Iesu Crist, that is lawe of pitee, whan he seyde to the womman that was founden in avoutrie, and sholde han been slayn with stones, after the wil of the Iewes, as was hir lawe: ‘Go,’ quod Iesu Crist, ‘and have na-more wil to sinne’; or, ‘wille na-more to do sinne.’ / Soothly, the vengeaunce of avoutrie is awarded to the peynes of helle, but-if so be that it be destourbed by penitence. /890 Yet been ther mo speces of this cursed sinne; as whan that oon of hem is religious, or elles bothe; or of folk that been entred in-to ordre, as subdekne or dekne, or preest, or hospitaliers. And evere the hyer that he is in ordre, the gretter is the sinne. / The thinges that gretly agreggen hir sinne is the brekinge of hir avow of chastitee, whan they receyved the ordre. / And forther-over, sooth is, that holy ordre is chief of al the tresorie of god, and his especial signe and mark of chastitee; to shewe that they been ioyned to chastitee, which that is most precious lyf that is. / And thise ordred folk been specially tytled to god, and of the special meynee of god; for which, whan they doon deedly sinne, they been the special traytours of god and of his peple; for they liven of the peple, to preye for the peple, and whyle they been suche traitours, hir preyers availen nat to the peple. / Preestes been aungeles, as by the dignitee of hir misterye; but for sothe, seint Paul seith, that 'Sathanas transformeth him in an aungel of light.' /895 Soothly, the preest that haunteth deedly sinne, he may be lykned to the aungel of derknesse transformed in the aungel of light; he semeth aungel of light, but for sothe he is aungel of derknesse. / Swiche preestes been the sones of Helie, as sheweth in the book of Kinges, that they weren the sones of Belial, that is, the devel. / Belial is to seyn ‘with-outen Iuge’; and so faren they; hem thinketh they been free, and han no Iuge, na-more than hath a free bole that taketh which cow that him lyketh in the toun. / So faren they by wommen. For right as a free bole is y-nough for al a toun, right so is a wikked preest corrupcioun y-nough for al a parisshe, or for al a contree. / Thise preestes, as seith the book, ne conne nat the misterie of preesthode to the peple, ne god ne knowe they nat; they ne helde hem nat apayd, as seith the book, of soden flesh that was to hem offred, but they toke by force the flesh that is rawe. /900 Certes, so thise shrewes ne holden hem nat apayed of rosted flesh and sode flesh, with which the peple fedden hem in greet reverence, but they wole have raw flesh of folkes wyves and hir doghtres. / And certes, thise wommen that consenten to hir harlotrie doon greet wrong to Crist and to holy chirche and alle halwes, and to alle soules; for they bireven alle thise him that sholde worshipe Crist and holy chirche, and preye for cristene soules. / And therfore han swiche preestes, and hir lemmanes eek that consenten to hir lecherie, the malisoun of al the court cristen, till they come to amendement. / The thridde spece of avoutrie is som-tyme bitwixe a man and his wyf; and that is whan they take no reward in hir assemblinge, but only to hire fleshly delyt, as seith seint Ierome; / and ne rekken of nothing but that they been assembled; by-cause that they been maried, al is good y-nough, as thinketh to hem. /905 But in swich folk hath the devel power, as seyde the aungel Raphael to Thobie; for in hir assemblinge they putten Iesu Crist out of hir herte, and yeven hem-self to alle ordure. / The fourthe spece is, the assemblee of hem that been of hire kinrede, or of hem that been of oon affinitee, or elles with hem with whiche hir fadres or hir kinrede han deled in the sinne of lecherie; this sinne maketh hem lyk to houndes, that taken no kepe to kinrede. / And certes, parentele is in two maneres, outher goostly or fleshly; goostly, as for to delen with hise godsibbes. / For right so as he that engendreth a child is his fleshly fader, right so is his godfader his fader espirituel. For which a womman may in no lasse sinne assemblen with hir godsib than with hir owene fleshly brother. / The fifthe spece is thilke abhominable sinne, of which that no man unnethe oghte speke ne wryte, nathelees it is openly reherced in holy writ. /910 This cursednesse doon men and wommen in diverse entente and in diverse manere; but though that holy writ speke of horrible sinne, certes, holy writ may nat been defouled, na-more than the sonne that shyneth on the mixen. / Another sinne aperteneth to lecherie, that comth in slepinge; and this sinne cometh ofte to hem that been maydenes, and eek to hem that been corrupt; and this sinne men clepen pollucioun, that comth in foure maneres. / Somtyme, of languissinge of body; for the humours been to ranke and habundaunt in the body of man. Somtyme of infermetee; for the feblesse of the vertu retentif, as phisik maketh mencioun. Som-tyme, for surfeet of mete and drinke. / And somtyme of vileyns thoghtes, that been enclosed in mannes minde whan he goth to slepe; which may nat been with-oute sinne. For which men moste kepen hem wysely, or elles may men sinnen ful grevously. /
853. Hl. as a basiliskoc. 857. Hl. dotard fooles holours. C m. and smatere hem thow they may nat doon. 858. Tyrwhitt has bushes; E. Seld. Ln. beauteis; Cm. beauteis; Hl. beautes; Pt. bewtees. 869. After fructus, Hl. adds secundum Ieronimum contra Iouinianum. 881. Hl. Pt. horribly; E. Cm. horrible. 882. E. Actour (error for Auctour). 884. E. Hl. om. ther-of. E. ocupien. 887. E. Vnderstoond. E. Pt. Ln. Hl. Seld. gladly; Cm. om. E. comandementz. 891. Pt. Hl. or deken; Ln. & deken; Cm. dekene; E. om. 894. E. meignee; Ln. Hl. meyne. E. Cm. om. to preye . . . to the peple; the clause occurs in Pt. Ln. Selden, and partly in Hl. 897. Seld. Pt. Ln. Hl. Belye (for Helye); Cm. Belyal. 900. Cm. helde; rest holde. 903. E. cristiene; Hl. cristian; Cm. cristene; rest cristen. 908. Pt. Ln. Parentela; Hl. parenteal. 909. E. espiritueel. 911. Pt. myxen; Cm. myxene; E. Mixne; Seld. Ln. mexen; Hl. dongehul. 912. E. Polucioun. 912. E. Cm. iij; rest iiij. 913. Pt. feblesse; E. fieblesse; Cm. febillesse; Ln. Hl. feblenesse. 914. Cm. muste (for moste). E. greously (!).
Remedium contra peccatum Luxurie.
§ 77. Now comth the remedie agayns Lecherie, and that is, generally, Chastitee and Continence, that restreyneth alle the desordeynee moevinges that comen of fleshly talentes. /915 And evere the gretter merite shal he han, that most restreyneth the wikkede eschaufinges of the ordure of this sinne. And this is in two maneres, that is to seyn, chastitee in mariage, and chastitee of widwehode. / Now shaltow understonde, that matrimoine is leefful assemblinge of man and of womman, that receyven by vertu of the sacrement the bond, thurgh which they may nat be departed in al hir lyf, that is to seyn, whyl that they liven bothe. / This, as seith the book, is a ful greet sacrement. God maked it, as I have seyd, in paradys, and wolde him-self be born in mariage. / And for to halwen mariage, he was at a weddinge, where-as he turned water in-to wyn; which was the firste miracle that he wroghte in erthe biforn hise disciples. / Trewe effect of mariage clenseth fornicacioun and replenisseth holy chirche of good linage; for that is the ende of mariage; and it chaungeth deedly sinne in-to venial sinne bitwise hem that been y-wedded, and maketh the hertes al oon of hem that been y-wedded, as wel as the bodies. /920 This is verray mariage, that was establissed by god er that sinne bigan, whan naturel lawe was in his right point in paradys; and it was ordeyned that o man sholde have but o womman, and o womman but o man, as seith Seint Augustin, by manye resouns. /
917. E. boond. 921. E. Cm. om. This is. E. natureel.
§ 78. First, for mariage is figured bitwixe Crist and holy chirche. And that other is, for a man is heved of a womman; algate, by ordinaunce it sholde be so. / For if a womman had mo men 632than oon, thanne sholde she have mo hevedes than oon, and that were an horrible thing biforn god; and eek a womman ne mighte nat plese to many folk at ones. And also ther ne sholde nevere be pees ne reste amonges hem; for everich wolde axen his owene thing. / And forther-over, no man ne sholde knowe his owene engendrure, ne who sholde have his heritage; and the womman sholde been the lasse biloved, fro the time that she were conioynt to many men. /
923. E. no (for mo) before men.
§ 79. Now comth, how that a man sholde bere him with his wyf; and namely, in two thinges, that is to seyn in suffraunce and reverence, as shewed Crist whan he made first womman. /925 For he ne made hir nat of the heved of Adam, for she sholde nat clayme to greet lordshipe. / For ther-as the womman hath the maistrie, she maketh to muche desray; ther neden none ensamples of this. The experience of day by day oghte suffyse. / Also certes, god ne made nat womman of the foot of Adam, for she ne sholde nat been holden to lowe; for she can nat paciently suffre: but god made womman of the rib of Adam, for womman sholde be felawe un-to man. / Man sholde bere him to his wyf in feith, in trouthe, and in love, as seith seint Paul: that ‘a man sholde loven his wyf as Crist loved holy chirche, that loved it so wel that he deyde for it.’ So sholde a man for his wyf, if it were nede. /
927. Hl. disaray; Pt. Ln. disaraye.
§ 80. Now how that a womman sholde be subget to hir housbonde, that telleth seint Peter. First, in obedience. /930 And eek, as seith the decree, a womman that is a wyf, as longe as she is a wyf, she hath noon auctoritee to swere ne bere witnesse with-oute leve of hir housbonde, that is hir lord; algate, he sholde be so by resoun. / She sholde eek serven him in alle honestee, and been attempree of hir array. I wot wel that they sholde setten hir entente to plesen hir housbondes, but nat by hir queyntise of array. / Seint Ierome seith, that wyves that been apparailled in silk and in precious purpre ne mowe nat clothen hem in Iesu Crist. What seith seint Iohn eek in this matere? / Seint Gregorie eek seith, that no wight seketh precious array but only for veyne glorie, to been honoured the more biforn the peple. / It is a greet folye, a womman to have a fair array outward and in hir-self be foul inward. /935 A wyf sholde eek be mesurable in lokinge and in beringe and in laughinge, and discreet in alle hir wordes and hir dedes. / And aboven alle worldly thing she sholde loven hir housbonde with al hir herte, and to him be trewe of hir body / so sholde an housbonde eek be to his wyf. For sith that al the body is the housbondes, so sholde hir herte been, or elles ther is bitwixe hem two, as in that, no parfit mariage. / Thanne shal men understonde that for three thinges a man and his wyf fleshly mowen assemble. The firste is in entente of engendrure of children to the service of god, for certes that is the cause fynal of matrimoine. / Another cause is, to yelden everich of hem to other the dette of hir bodies, for neither of hem hath power over his owene body. The thridde is, for to eschewe lecherye and vileinye. The ferthe is for sothe deadly sinne. /940 As to the firste, it is meritorie; the seconde also; for, as seith the decree, that she hath merite of chastitee that yeldeth to hir housbonde the dette of hir body, ye, though it be agayn hir lykinge and the lust of hir herte. / The thridde manere is venial sinne, and trewely scarsly may ther any of thise be with-oute venial sinne, for the corrupcion and for the delyt. / The fourthe manere is for to understonde, if they assemble only for amorous love and for noon of the forseyde causes, but for to accomplice thilke brenninge delyt, they rekke nevere how ofte, sothly it is deedly sinne; and yet, with sorwe, somme folk wol peynen hem more to doon than to hir appetyt suffyseth. /
931. E. Cm. that is wyf; Hl. that is a wif. 935. Cm. Pt. be; Hl. to ben; Ln. bue; E. om. 941. E. om. merite of chastitee. 942. E. om. of.
§ 81. The seconde manere of chastitee is for to been a clene widewe, and eschue the embracinges of man, and desyren the embracinge of Iesu Crist. / Thise been tho that han been wyves and han forgoon hir housbondes, and eek wommen that han doon lecherie and been releeved by Penitence. /945 And certes, if that a wyf coude kepen hir al chaast by licence of hir housbonde, so that she yeve nevere noon occasion that he agilte, it were to hire a greet merite. / Thise manere wommen that observen chastitee moste be clene in herte as well as in body and in thoght, and mesurable in clothinge and in contenaunce; and been abstinent in etinge and drinkinge, in spekinge, and in dede. They been the vessel or the boyste of the blissed Magdelene, that fulfilleth holy chirche of good odour. / The thridde manere of chastitee is virginitee, and it bihoveth that she be holy in herte and clene of body; thanne is she spouse to Iesu Crist, and she is the lyf of angeles. / She is the preisinge of this world, and she is as thise martirs in egalitee; she hath in hir that tonge may nat telle ne herte thinke. / Virginitee baar oure lord Iesu Crist, and virgin was him-selve. /950
947. E. om. moste be . . . mesurable.
§ 82. Another remedie agayns Lecherie is, specially to withdrawen swiche thinges as yeve occasion to thilke vileinye; as ese, etinge and drinkinge; for certes, whan the pot boyleth strongly, the beste remedie is to withdrawe the fyr. Slepinge longe in greet quiete is eek a greet norice to Lecherie. /
§ 83. Another remedie agayns Lecherie is, that a man or a womman eschue the companye of hem by whiche he douteth to be tempted; for al-be-it so that the dede is withstonden, yet is ther greet temptacioun. / Soothly a whyt wal, al-though it ne brenne noght fully by stikinge of a candele, yet is the wal blak of the leyt. / Ful ofte tyme I rede, that no man truste in his owene perfeccioun, but he be stronger than Sampson, and holier than Daniel, and wyser than Salomon. /955
954. E. leyt; Pt. Ln. leyte; Cm. lyght.
§ 84. Now after that I have declared yow, as I can, the sevene deedly sinnes, and somme of hir braunches and hir remedies, soothly, if I coude, I wolde telle yow the ten comandements. / But so heigh a doctrine I lete to divines. Nathelees, I hope to god they been touched in this tretice, everich of hem alle. /
§ 85. Now for-as-muche as the second partie of Penitence stant in Confessioun of mouth, as I bigan in the firste chapitre, I seye, seint Augustin seith: / sinne is every word and every dede, and al that men coveiten agayn the lawe of Iesu Crist; and this is for to sinne in herte, in mouth, and in dede, by thy fyve wittes, that been sighte, heringe, smellinge, tastinge or savouringe, and felinge. / Now is it good to understonde that that agreggeth muchel every sinne. /960 Thou shall considere what thou art that doost the sinne, whether thou be male or femele, yong or old, gentil or thral, free or servant, hool or syk, wedded or sengle, ordred or unordred, wys or fool, clerk or seculer; / if she be of 635thy kinrede, bodily or goostly, or noon; if any of thy kinrede have sinned with hir or noon, and manye mo thinges. /
960. Pt. Hl. the circumstances that; Ln. the circumstance that (for that that). 961. E. seculeer.
§ 86. Another circumstaunce is this; whether it be doon in fornicacioun, or in avoutrie, or noon; incest, or noon; mayden, or noon; in manere of homicyde, or noon; horrible grete sinnes, or smale; and how longe thou hast continued in sinne. / The thridde circumstaunce is the place ther thou hast do sinne; whether in other mennes hous or in thyn owene; in feeld or in chirche, or in chirche-hawe; in chirche dedicat, or noon. / For if the chirche be halwed, and man or womman spille his kinde inwith that place by wey of sinne, or by wikked temptacion, the chirche is entredited til it be reconciled by the bishop; /965 and the preest that dide swich a vileinye, to terme of al his lyf, he sholde na-more singe masse; and if he dide, he sholde doon deedly sinne at every tyme that he so songe masse. / The fourthe circumstaunce is, by whiche mediatours or by whiche messagers, as for entycement, or for consentement to bere companye with felaweshipe; for many a wrecche, for to bere companye, wil go to the devel of helle. / Wher-fore they that eggen or consenten to the sinne been parteners of the sinne, and of the dampnacioun of the sinner. / The fifthe circumstaunce is, how manye tymes that he hath sinned, if it be in his minde, and how ofte that he hath falle. / For he that ofte falleth in sinne, he despiseth the mercy of god, and encreesseth his sinne, and is unkinde to Crist; and he wexeth the more feble to withstonde sinne, and sinneth the more lightly, /970 and the latter aryseth, and is the more eschew for to shryven him, namely, to him that is his confessour. / For which that folk, whan they falle agayn in hir olde folies, outher they forleten hir olde confessours al outrely, or elles they departen hir shrift in diverse places; but soothly, swich departed shrift deserveth no mercy of god of hise sinnes. / The sixte circumstaunce is, why that a man sinneth, as by whiche temptacioun; and if him-self procure thilke temptacioun, or by the excytinge of other folk; or if he sinne with a womman by force, or by hir owene assent; / or if the womman, maugree hir heed, hath been afforced, or noon; this shal she telle; for coveitise, or for poverte, and if it was hir procuringe or noon; and swiche manere harneys. / The seventhe circumstaunce is, in what manere he hath doon his sinne, or how that she hath suffred that folk han doon to hir. /975 And the same shal the man telle pleynly, with alle circumstaunces; and whether he hath sinned with comune bordel-wommen, or noon; / or doon his sinne in holy tymes, or noon; in fasting-tymes, or noon; or biforn his shrifte, or after his latter shrifte; / and hath, per-aventure, broken ther-fore his penance enioyned; by whos help and whos conseil; by sorcerie or craft; al moste be told. / Alle thise thinges, after that they been grete or smale, engreggen the conscience of man. And eek the preest that is thy Iuge, may the bettre been avysed of his Iugement in yevinge of thy penaunce, and that is after thy contricioun. / For understond wel, that after tyme that a man hath defouled his baptesme by sinne, if he wole come to salvacioun, ther is noon other wey but by penitence and shrifte and satisfaccioun; /980 and namely by the two, if ther be a confessour to which he may shryven him; and the thridde, if he have lyf to parfournen it. /
964. E. dedicaat. 965. E. Cm. om. til . . . bishop. 967. wil] E. shal. 968. dampnacioun] E. Cm. temptacioun. 970. E. fieble. 973. Pt. Ln. H. whiche; rest om.
§ 87. Thanne shal man looke and considere, that if he wole maken a trewe and a profitable confessioun, ther moste be foure condiciouns. / First, it moot been in sorweful bitternesse of herte, as seyde the king Ezekias to god: ‘I wol remembre me alle the yeres of my lyf in bitternesse of myn herte.’ / This condicioun of bitternesse hath fyve signes. The firste is, that confessioun moste be shamefast, nat for to covere ne hyden his sinne, for he hath agilt his god and defouled his soule. / And her-of seith seint Augustin: ‘the herte travailleth for shame of his sinne’; and for he hath greet shamefastnesse, he is digne to have greet mercy of god. /985 Swich was the confession of the publican, that wolde nat heven up hise eyen to hevene, for he hadde offended god of hevene; for which shamefastnesse he hadde anon the mercy of god. / And ther-of seith seint Augustin, that swich shamefast folk been next foryevenesse and remissioun. / Another signe is humilitee in confessioun; of which seith seint Peter, ‘Humbleth yow under the might of god.’ The hond of god is mighty in confession, for ther-by god foryeveth thee thy sinnes; for he allone hath the power. / And this humilitee shal been in herte, and in signe outward; for right as he hath humilitee to god in his herte, right so sholde he humble his body outward to the preest that sit in goddes place. / For which in no manere, sith that Crist is sovereyn and the preest mene and mediatour bitwixe Crist and the sinnere, and the sinnere is the laste by wey of resoun, /990 thanne sholde nat the sinnere sitte as heighe as his confessour, but knele biforn him or at his feet, but-if maladie destourbe it. For he shal nat taken kepe who sit there, but in whos place that he sitteth. / A man that hath trespased to a lord, and comth for to axe mercy and maken his accord, and set him doun anon by the lord, men wolde holden him outrageous, and nat worthy so sone for to have remissioun ne mercy. / The thridde signe is, how that thy shrift sholde be ful of teres, if man may; and if man may nat wepe with hise bodily eyen, lat him wepe in herte. / Swich was the confession of seint Peter; for after that he hadde forsake Iesu Crist, he wente out and weep ful bitterly. / The fourthe signe is, that he ne lette nat for shame to shewen his confessioun. /995 Swich was the confessioun of the Magdelene, that ne spared, for no shame of hem that weren atte feste, for to go to oure lord Iesu Crist and biknowe to him hir sinnes. / The fifthe signe is, that a man or a womman be obeisant to receyven the penaunce that him is enioyned for hise sinnes; for certes Iesu Crist, for the giltes of a man, was obedient to the deeth. /
983. All Ezekiel; read Ezekias (Isaiah xxxviii. 15). 985. E. ther-of; rest her-of. 986. E. Ln. puplican. 993. E. teeris.
§ 88. The seconde condicion of verray confession is, that it be hastily doon; for certes, if a man hadde a deedly wounde, evere the lenger that he taried to warisshe him-self, the more wolde it corrupte and haste him to his deeth; and eek the wounde wolde be the wors for to hele. / And right so fareth sinne, that longe tyme is in a man unshewed. / Certes, a man oghte hastily shewen hise sinnes for manye causes; as for drede of deeth, that cometh ofte sodenly, and is in no certeyn what tyme it shal be, ne in what place; and eek the drecchinge of o synne draweth in another; /1000 and eek the lenger that he tarieth, the ferther he is fro Crist. And if he abyde to his laste day, scarsly may he shryven him or remembre him of hise sinnes, or repenten him, for the grevous maladie of his deeth. / And for-as-muche as he ne hath nat in his lyf herkned Iesu Crist, whanne he hath spoken, he shal crye to Iesu Crist at his laste day, and scarsly wol he herkne him. / And understond that this condicioun moste han foure thinges. Thy shrift moste be purveyed bifore and avysed; for wikked haste doth no profit; and that a man conne shryve him of hise sinnes be it of pryde, or of envye, and so forth of the speces and circumstances; / and that he have comprehended in his minde the nombre and the greetnesse of hise sinnes, and how longe that he hath leyn in sinne; / and eek that he be contrit of hise sinnes, and in stedefast purpos, by the grace of god, nevere eft to falle in sinne; and eek that he drede and countrewaite him-self, that he flee the occasiouns of sinne to whiche he is enclyned. /1005 Also thou shalt shryve thee of alle thy sinnes to o man, and nat a parcel to o man and a parcel to another; that is to understonde, in entente to departe thy confessioun as for shame or drede; for it nis but stranglinge of thy soule. / For certes, Iesu Crist is entierly al good; in him nis noon inperfeccioun; and therfore outher he foryeveth al parfitly or never a deel. / I seye nat that if thou be assigned to the penitauncer for certein sinne, that thou art bounde to shewen him al the remenaunt of thy sinnes, of whiche thou hast be shriven to thy curat, but-if it lyke to thee of thyn humilitee; this is no departinge of shrifte. / Ne I seye nat, ther-as I speke of divisioun of confessioun, that if thou have lycence for to shryve thee to a discreet and an honeste preest, where thee lyketh, and by lycence of thy curat, that thou ne mayst wel shryve thee to him of alle thy sinnes. / But lat no blotte be bihinde; lat no sinne been untold, as fer as thou hast remembraunce. /1010 And whan thou shalt be shriven to thy curat, telle him eek alle the sinnes that thou hast doon sin thou were last y-shriven; this is no wikked entente of divisioun of shrifte. /
1000. Pt. Ln. Seld. is in; rest om. 1005. E. stidefast; Cm. Hl. stedefast. 1008, 1009, 1011. E. curaat.
§ 89. Also the verray shrifte axeth certeine condiciouns. First, that thou shryve thee by thy free wil, noght constreyned, ne for shame of folk, ne for maladie, ne swiche thinges; for it is resoun that he that trespasseth by his free wil, that by his free wil he confesse his trespas; / and that noon other man telle his sinne but he him-self, ne he shal nat nayte ne denye his sinne, ne wratthe him agayn the preest for his amonestinge to leve sinne. / The seconde condicioun is, that thy shrift be laweful; that is to seyn, that thou that shryvest thee, and eek the preest that hereth thy confessioun, been verraily in the feith of holy chirche; / and that a man ne be nat despeired of the mercy of Iesu Crist, as Caym or Iudas. /1015 And eek a man moot accusen him-self of his owene trespas, and nat another; but he shal blame and wyten him-self and his owene malice of his sinne, and noon other; / but nathelees, if that another man be occasioun or entycer of his sinne, or the estaat of a persone be swich thurgh which his sinne is agregged, or elles that he may nat pleynly shryven him but he telle the persone with which he hath sinned; thanne may he telle; / so that his entente ne be nat to bakbyte the persone, but only to declaren his confessioun. /
§ 90. Thou ne shall nat eek make no lesinges in thy confessioun; for humilitee, per-aventure, to seyn that thou hast doon sinnes of whiche that thou were nevere gilty. / For Seint Augustin seith: if thou, by cause of thyn humilitee, makest lesinges on thy-self, though thou ne were nat in sinne biforn, yet artow thanne in sinne thurgh thy lesinges. /1020 Thou most eek shewe thy sinne by thyn owene propre mouth, but thou be wexe doumb, and nat by no lettre; for thou that hast doon the sinne, thou shalt have the shame therfore. / Thou shalt nat eek peynte thy confessioun by faire subtile wordes, to covere the more thy sinne; for thanne bigylestow thy-self and nat the preest; thou most tellen it pleynly, be it nevere so foul ne so horrible. / Thou shalt eek shryve thee to a preest that is discreet to conseille thee, and eek thou shalt nat shryve thee for veyne glorie, ne for ypocrisye, ne for no cause, but only for the doute of Iesu Crist and the hele of thy soule. / Thou shalt nat eek renne to the preest sodeynly, to tellen him lightly thy sinne, as who-so telleth a Iape or a tale, but avysely and with greet devocioun. / And generally, shryve thee ofte. If thou ofte falle, ofte thou aryse by confessioun. /1025 And thogh thou shryve thee ofter than ones of sinne, of which thou hast be shriven, it is the more merite. And, as seith seint Augustin, thou shalt have the more lightly relesing and grace of god, bothe of sinne and of peyne. / And certes, ones a yere atte leeste wey it is laweful for to been housled; for certes ones a yere alle thinges renovellen. /
1021. Cm. Pt. wexe; E. Hl. woxe. 1023. E. om. 2nd thee.
Explicit secunda pars Penitencie; et sequitur tercia pars eiusdem, de Satisfaccione.
§ 91. Now have I told you of verray Confessioun, that is the seconde partie of Penitence. /
1028. E. toolde.
The thridde partie of Penitence is Satisfaccioun; and that stant most generally in almesse and in bodily peyne. / Now been ther three manere of almesses; contricion of herte, where a man offreth himself to god; another is, to han pitee of defaute of hise neighebores; and the thridde is, in yevinge of good conseil goostly and bodily, where men han nede, and namely in sustenaunce of mannes fode. /1030 And tak keep, that a man hath need of thise thinges generally; he hath need of fode, he hath nede of clothing, and herberwe, he hath nede of charitable conseil, and visitinge in prisone and in maladie, and sepulture of his dede body. / And if thou mayst nat visite the nedeful with thy persone, visite him by thy message and by thy yiftes. / Thise been generally almesses or werkes of charitee of hem that han temporel richesses or discrecioun in conseilinge. Of thise werkes shaltow heren at the day of dome. /
1031. Hl. keep; Pt. Ln. kepe; E. Cm. om. 1033. E. temporeel.
§ 92. Thise almesses shaltow doon of thyne owene propre thinges, and hastily, and prively if thou mayst; / but nathelees, if thou mayst nat doon it prively, thou shalt nat forbere to doon almesse though men seen it; so that it be nat doon for thank of the world, but only for thank of Iesu Crist. /1035 For as witnesseth Seint Mathew, capitulo quinto, ‘A citee may nat been hid that is set on a montayne; ne men lighte nat a lanterne and put it under a busshel; but men sette it on a candle-stikke, to yeve light to the men in the hous. / Right so shal youre light lighten bifore men, that they may seen youre gode werkes, and glorifie youre fader that is in hevene.’ /
§ 93. Now as to speken of bodily peyne, it stant in preyeres, in wakinges, in fastinges, in vertuouse techinges of orisouns. / And ye shul understonde, that orisouns or preyeres is for to seyn a pilous wil of herte, that redresseth it in god and expresseth it by word outward, to remoeven harmes and to han thinges espirituel and durable, and somtyme temporel thinges; of whiche orisouns, certes, in the orisoun of the Pater-noster, hath Iesu Crist enclosed most thinges. / Certes, it is privileged of three thinges in his dignitee, for which it is more digne than any other preyere; for that Iesu Crist him-self maked it; /1040 and it is short, for it sholde be coud the more lightly, and for to withholden it the more esily in herte, and helpen him-self the ofter with the orisoun; / 641and for a man sholde be the lasse wery to seyen it, and for a man may nat excusen him to lerne it, it is so short and so esy; and for it comprehendeth in it-self alle gode preyeres. / The exposicioun of this holy preyere, that is so excellent and digne, I bitake to thise maistres of theologie; save thus muchel wol I seyn: that, whan thou prayest that god sholde foryeve thee thy giltes as thou foryevest hem that agilten to thee, be ful wel war that thou be nat out of charitee. / This holy orisoun amenuseth eek venial sinne; and therfore it aperteneth specially to penitence. /
1039. E. espiritueel; temporele.
§ 94. This preyere moste be trewely seyd and in verray feith, and that men preye to god ordinatly and discreetly and devoutly; and alwey a man shal putten his wil to be subget to the wille of god. /1045 This orisoun moste eek been seyd with greet humblesse and ful pure; honestly, and nat to the anoyaunce of any man or womman. It moste eek been continued with the werkes of charitee. / It avayleth eek agayn the vyces of the soule; for, as seith seint Ierome, ‘By fastinge been saved the vyces of the flesh, and by preyere the vyces of the soule.’ /
1047. vyces (3)] E. vertues; Cm. vertu.
§ 95. After this, thou shalt understonde, that bodily peyne stant in wakinge; for Iesu Crist seith, ‘waketh, and preyeth that ye ne entre in wikked temptacioun.’ / Ye shul understanden also, that fastinge stant in three thinges; in forberinge of bodily mete and drinke, and in forberinge of worldly Iolitee, and in forberinge of deedly sinne; this is to seyn, that a man shal kepen him fro deedly sinne with al his might. /
§ 96. And thou shalt understanden eek, that god ordeyned fastinge; and to fastinge appertenen foure thinges. /1050 Largenesse to povre folk, gladnesse of herte espirituel, nat to been angry ne anoyed, ne grucche for he fasteth; and also resonable houre for to ete by mesure; that is for to seyn, a man shal nat ete in untyme, ne sitte the lenger at his table to ete for he fasteth. /
1051. E. espiritueel.
§ 97. Thanne shaltow understonde, that bodily peyne stant in disciplyne or techinge, by word or by wrytinge, or in ensample. Also in weringe of heyres or of stamin, or of haubergeons on hir naked flesh, for Cristes sake, and swiche manere penances. / But war thee wel that swiche manere penances on thy flesh ne make nat thyn herte bitter or angry or anoyed of thy-self; for bettre is to caste 642awey thyn heyre, than for to caste away the sikernesse of Iesu Crist. / And therfore seith seint Paul: ‘Clothe yow, as they that been chosen of god, in herte of misericorde, debonairetee, suffraunce, and swich manere of clothinge’; of whiche Iesu Crist is more apayed than of heyres, or haubergeons, or hauberkes. /
1052. or by] E. and by. 1053. nat . . . bitter] E. Cm. thee nat. 1053. sikernesse] Pt. Ln. Hl. swetnesse.
§ 98. Thanne is disciplyne eek in knokkinge of thy brest, in scourginge with yerdes, in knelinges, in tribulacions; /1055 in suffringe paciently wronges that been doon to thee, and eek in pacient suffraunce of maladies, or lesinge of worldly catel, or of wyf, or of child, or othere freendes. /
§ 99. Thanne shaltow understonde, whiche thinges destourben penaunce; and this is in foure maneres, that is, drede, shame, hope, and wanhope, that is, desperacion. / And for to speke first of drede; for which he weneth that he may suffre no penaunce; / ther-agayns is remedie for to thinke, that bodily penaunce is but short and litel at regard of the peyne of helle, that is so cruel and so long, that it lasteth with-outen ende. /
1058. weneth] E. demeth. 1059. E. crueel; peynes.
§ 100. Now again the shame that a man hath to shryven him, and namely, thise ypocrites that wolden been holden so parfite that they han no nede to shryven hem; /1060 agayns that shame, sholde a man thinke that, by wey of resoun, that he that hath nat been ashamed to doon foule thinges, certes him oghte nat been ashamed to do faire thinges, and that is confessiouns. / A man sholde eek thinke, that god seeth and wool alle hise thoghtes and alle hise werkes; to him may no thing been hid ne covered. / Men sholden eek remembren hem of the shame that is to come at the day of dome, to hem that been nat penitent and shriven in this present lyf. / For alle the creatures in erthe and in helle shullen seen apertly al that they hyden in this world. /
1061. ashamed (1)] E. shamed.
§ 101. Now for to speken of the hope of hem that been necligent and slowe to shryven hem, that stant in two maneres. /1065 That oon is, that he hopeth for to live longe and for to purchacen muche richesse for his delyt, and thanne he wol shryven him; and, as he seith, him semeth thanne tymely y-nough to come to shrifte. Another is, surquidrie that he hath in Cristes mercy. / Agayns the firste vyce, he shal thinke, that oure lyf is in no sikernesse; and eek that alle the richesses in this world ben in aventure, and passen as a shadwe on the wal. / And, as seith seint Gregorie, 643that it aperteneth to the grete rightwisnesse of god, that nevere shal the peyne stinte of hem that nevere wolde withdrawen hem fro sinne, hir thankes, but ay continue in sinne; for thilke perpetuel wil to do sinne shul they han perpetuel peyne. /
1065. E. om. the. 1069. E. perpetueel (twice).
§ 102. Wanhope is in two maneres: the firste wanhope is in the mercy of Crist; that other is that they thinken, that they ne mighte nat longe persevere in goodnesse. /1070 The firste wanhope comth of that he demeth that he hath sinned so greetly and so ofte, and so longe leyn in sinne, that he shal nat be saved. / Certes, agayns that cursed wanhope sholde he thinke, that the passion of Iesu Crist is more strong for to unbinde than sinne is strong for to binde. / Agayns the seconde wanhope, he shal thinke, that as ofte as he falleth he may aryse agayn by penitence. And thogh he never so longe have leyn in sinne, the mercy of Crist is alwey redy to receiven him to mercy. / Agayns the wanhope, that he demeth that he sholde nat longe persevere in goodnesse, he shal thinke, that the feblesse of the devel may no-thing doon but-if men wol suffren him; / and eek he shal han strengthe of the help of god, and of al holy chirche, and of the proteccioun of aungels, if him list. /1075
§ 103. Thanne shal men understonde what is the fruit of penaunce; and, after the word of Iesu Crist, it is the endelees blisse of hevene, / ther Ioye hath no contrarioustee of wo ne grevaunce, ther alle harmes been passed of this present lyf; ther-as is the sikernesse fro the peyne of helle; ther-as is the blisful companye that reioysen hem everemo, everich of otheres Ioye; / ther-as the body of man, that whylom was foul and derk, is more cleer than the sonne; ther-as the body, that whylom was syk, freele, and feble, and mortal, is inmortal, and so strong and so hool that ther may no-thing apeyren it; / ther-as ne is neither hunger, thurst, ne cold, but every soule replenissed with the sighte of the parfit knowinge of god. / This blisful regne may men purchace by poverte espirituel, and the glorie by lowenesse; the plentee of Ioye by hunger and thurst, and the reste by travaille; and the lyf by deeth and mortificacion of sinne. /1080
1078. E. fieble. 1080. E. espiritueel; om. deeth and.
Here taketh the makere of this book his leve.
§ 104. Now preye I to hem alle that herkne this litel tretis or rede, that if ther be any thing in it that lyketh hem, that ther-of they thanken oure lord Iesu Crist, of whom procedeth al wit and al goodnesse. / And if ther be any thing that displese hem, I preye hem also that they arrette it to the defaute of myn unconninge, and nat to my wil, that wolde ful fayn have seyd bettre if I hadde had conninge. / For oure boke seith, ‘al that is writen is writen for oure doctrine’; and that is myn entente. / Wherfore I biseke yow mekely for the mercy of god, that ye preye for me, that Crist have mercy on me and foryeve me my giltes: / — and namely, of my translacions and endytinges of worldly vanitees, the whiche I revoke in my retracciouns: /1085 as is the book of Troilus; The book also of Fame; The book of the nynetene Ladies; The book of the Duchesse; The book of seint Valentynes day of the Parlement of Briddes; The tales of Caunterbury, thilke that sounen in-to sinne; / The book of the Leoun; and many another book, if they were in my remembrance; and many a song and many a lecherous lay; that Crist for his grete mercy foryeve me the sinne. / But of the translacion of Boece de Consolacione, and othere bokes of Legendes of seintes, and omelies, and moralitee, and devocioun, / that thanke I oure lord Iesu Crist and his blisful moder, and alle the seintes of hevene; / bisekinge hem that they from hennes-forth, un-to my lyves ende, sende me grace to biwayle my giltes, and to studie to the salvacioun of my soule:— and graunte me grace of verray penitence, confessioun and satisfaccioun to doon in this present lyf; /1090 thurgh the benigne grace of him that is king of kinges and preest over alle preestes, that boghte us with the precious blood of his herte; / so that I may been oon of hem at the day of dome that shulle be saved: Qui cum patre, &c. /1092
1086. E. Pt. xxv; Ln. xv; Hl. 29; read nynetene.
Here is ended the book of the Tales of Caunterbury, compiled by Geffrey Chaucer, of whos soule Iesu Crist have mercy. Amen.
Last updated Tuesday, August 25, 2015 at 14:06