The Canterbury Tales, by Geoffrey Chaucer

Group E

The Clerk’s Prologue.

Here folweth the Prologe of the Clerkes Tale of Oxenford.

‘Sir clerk of Oxenford,’ our hoste sayde,

‘Ye ryde as coy and stille as dooth a mayde,

Were newe spoused, sitting at the bord;

This day ne herde I of your tonge a word.

5

I trowe ye studie aboute som sophyme,

But Salomon seith, “every thing hath tyme.”

1. Hl. hoste; Cp. Ln. oste; E. Hn. hoost.

 For goddes sake, as beth of bettre chere,

It is no tyme for to studien here.

Telle us som mery tale, by your fey;

10

For what man that is entred in a pley,

He nedes moot unto the pley assente.

But precheth nat, as freres doon in Lente,

To make us for our olde sinnes wepe,

Ne that thy tale make us nat to slepe.

15

 Telle us som mery thing of aventures; —

Your termes, your colours, and your figures,

Kepe hem in stoor til so be ye endyte

Heigh style, as whan that men to kinges wryte.

Speketh so pleyn at this tyme, I yow preye,

20

That we may understonde what ye seye.’

17. E. Hl. that ye; rest omit that.   19. E. Hn. we; rest I.

 This worthy clerk benignely answerde,

‘Hoste,’ quod he, ‘I am under your yerde;

Ye han of us as now the governaunce,

And therfor wol I do yow obeisaunce,

25

As fer as reson axeth, hardily.

I wol yow telle a tale which that I

Lerned at Padowe of a worthy clerk,

As preved by his wordes and his werk.

He is now deed and nayled in his cheste,

30

I prey to god so yeve his soule reste!

22. Ln. Oste; E. Hn. Pt. Hoost; Hl. Sir host.

 Fraunceys Petrark, the laureat poete,

Highte this clerk, whos rethoryke sweete

Enlumined al Itaille of poetrye,

As Linian dide of philosophye

35

Or lawe, or other art particuler;

But deeth, that wol nat suffre us dwellen heer

But as it were a twinkling of an yë,

Hem bothe hath slayn, and alle shul we dyë.

32. Hl. rethorique; Cp. retorique; Pt. retorike; E. Hn. Ln. rethorik.   36. E. omits suffre us.

 But forth to tellen of this worthy man,

40

That taughte me this tale, as I bigan,

I seye that first with heigh style he endyteth,

Er he the body of his tale wryteth,

A proheme, in the which discryveth he

Pemond, and of Saluces the contree,

45

And speketh of Apennyn, the hilles hye,

That been the boundes of West Lumbardye,

And of Mount Vesulus in special,

Where as the Poo, out of a welle smal,

Taketh his firste springing and his sours,

50

That estward ay encresseth in his cours

To Emelward, to Ferrare, and Venyse:

The which a long thing were to devyse.

And trewely, as to my Iugement,

Me thinketh it a thing impertinent,

55

Save that he wol convey en his matere:

But this his tale, which that ye may here.’

51. E. Hn. Emele; Hl. Emyl; Cp. Pt. Ln. Emel.   55. E. Hn. conuoyen; rest conueyen (-eye).   56. E. Hn. this his tale (where this is a contraction for this is; cf. mod. E. ’tis); Hl. Pt. this is the tale; Ln. this is tale.

http://ebooks.adelaide.edu.au/c/chaucer/canterbury/skeat/prologue14.html

Last updated Saturday, March 1, 2014 at 20:37